Dërguesi në kërkim të marrësit...

Ndoshta ndjehem dobët
ndoshta mirësia dështoi.
Do ta zhvesh me thonj mirësjelljen,
po më pengon të reagoj.

Më vjen për të qeshur
kur më duhet të kacafytem
gajasem kur shoh njerëz që në konfuzion
kot më kot zhyten.

Ndoshta kjo botë është kaq qesharake
dhe mërzia jonë kaq pakuptim,
ndoshta pjekuria e vërtetë
është ndërgjegjia që të nxit në reagim.


U lodha duke toleruar
u ngopa duke mirëkuptuar
e më dolën trutë për të gjetur
përherë një justifikim, një arsye, një ngushëllim.

Ndoshta erdhi koha
të pranoj që virtytet po ftojnë në mallkim,
të pranoj që urtësia
tani po përbën një krim.

Po e pranoj, është e vërtetë
që jam rrebel ndonjëherë
por e respektoj mendimin tënd
dhe kur ai s'përcjell asnjë vlerë.

Jo, sot dua të shpërthej
dua të them gjithçka me forcë,
me arrogancë dhe krenari,
dua t'ua kthej plumbin me plumb
forcën me forcën e vërtetë
injorimin me përballje
ironinë, në shigjetë të drejtëpërdrejtë.

Ju nuk e meritoni drejtësinë,
lirinë, demokracinë,
janë koncepte që nuk i njihni,
janë fjalë që nuk kuptoni
janë të drejta që ju vrasin
e ju shtyjnë të keqkuptoni,
duke ju zhytur me thellë në atë mjerim
që me kaq forcë e fantizëm mbroni.

Keni mësuar të kundërshtoni
pa mësuar më parë të kuptoni
pandehni se për të shkruar
s'është nevoja as që të lexoni.

Krijoni bindje, duke kundërshtuar
ato që mendojnë e peshojnë të tjerë
fitoni simpati dhe vëmendje
kur jeni kundra për çdo gjë e për çdoherë.

Fjalori juaj është i ndyrë,
logjika ju nxit gjithçka banale
ndërgjegja juaj një pus i errët
mbushur me mendime me natyrë anale.


E ndjeni veten të fortë
e ndjeni veten të ditur,
por vitet i përkasin trupit
jo atij trurit tuaj të mitur,
ku i vetmi kanal i thellë
që e përshkon atë rrafshnaltë
është kanali juaj i injorancës,
që ndan njerëz në lindje-perëndim
të majtë të djathtë
të përçarë tragjisht pa kuptim.


Urrejtja është gjuha juaj
prandaj sot shpresoj të më kuptoni
arroganca dhe fodullëku stili juaj
por ju s'mund ta privatizoni.

Sot do të bie në nivelin tuaj
duke shpresuar të jem më i qartë
o ju xhelozë, ziliqarë, intrigues
e gjithçka të zezë shpirti ju mbart.

Bashkë tok, jeni të fortë në çdo komb
se zhuli derrin e mban ngrohtë
sepse copat e pluhurit bashkohen
e ngjiten lart e më lart sot.

Ju kokëboshë manipulues mosmirënjohës,
defiçentë hundëpërpjetë,
krimba, thithëlopa, shushunja, gomerë
që ekzistoni vetëm për të qenë barrierë.

Ju farë e keqe kakzozash të verbëra,
që mbini pas çdo qëllimi human,
ju perversë impotentë
që gjallëroheni anembanë.
mësoni sot diçka të re me vlerë:
"Kush nuk është i aftë
të bëjë diçka të drejtë e të mirë
edhe kur ndërmerr qëllime shtazarake
niveli i tij është për mëshirë.


Shkroi : Stop Injorancës http://www.facebook.com/NdalPaditurise2

Vëllavrasja

Para disa ditësh në një katund të Dibrës, një shqiptar me emrin Fiqiri Buci vrau vellanë e tij Hilmi, për shkak të pronës; kjo ndodhi sepse njëri pati guxuar të mbjellë dy rrënjë domate më shumë matanë gardhit të shtëpisë, në sinor të tjetrit…

-Edlira 17- vjeçare, u vetëvar në Romë nga frika se mos e kthenin në Shqipëri…

-Një tjetër vajzë nga Elbasani, u vra në klasë në orën e mësimit…

-Katër shqiptarë u vranë nga policia maqedonase si të dyshuar për trafikantë armësh…

-Tre pasagjerë të një taksie u vranë në autostradë.

Vdekja në Shqipëri tanimë nuk quhet më vdekje, as kur është vrasje, as kur është vetëvrasje, aq më pak kur ndodh si aksident! Vdekja është bërë gjëja më e rëndomtë, mjaft që të jetë jashtë dhe larg shtëpisë tënde!

Por vrasja e vëllait nga vëllai vjen si një tjetër ububu e padëgjuar: për dy rrënjë domate jeta e një njeriu, për më tepër e një vëllai, mund të kushtojë më pak!

E pra, të dy vëllezërit dibranë, njëri i vrarë e tashmë i varrosur e tjetri i arrestuar e i burgosur, njëri ish arsimtar e tjetri ish polic (që do të thotë se vëllezërit nuk ishin dhe aq të pashkolluar), kishin gati 20 vjet në sherr e në grindje, pa hyrje-dalje, në hasmëri, për shkak të (keq)ndarjes së pronës. Në këtë sherrnajë të tejzgjatur, afërmendsh, domatet patën shërbyer si sebep dhe jo si një shkak i vërtetë: sepse shkaku i vërtetë i vrasjeve dhe vëllavrasjeve të përditshme ende nuk është zbuluar, e as kuptuar…
Politika tek ne nuk bën asnjë përpjekje për të shuar vëllavrasjet, gjakmarrjen, hakmarrjen, ngujimin apo edhe aksidentet nëpër rrugë, të cilat po e bëjnë shoqërinë shqiptare të ngjajë me një viktimë të pambrojtur e të çoroditur…

Politika po bën të pamundurën të mbajë sa më gjallë frymën e vëllavrasjes: sot a nuk janë shprehje të kësaj kolere kundërvënia e grave kundër grave, e të rinjve kundër të rinjve, e artistëve kundër artistëve, e mjekëve kundër mjekëve,e akademikëve kundër akademikëve, etj, etj?

Natyrisht që vrasja e vëllait nga vëllai nëpër kafenetë luksoze të VIP-ave të Tiranës nuk ka për të bërë më shumë përshtypje se greva e urisë në bulevardin “Dëshmorët e Kombit”…Por nuk besoj se më kundërshton dot kush po të guxoj të them se vëllavrasja në një katund të Dibrës është sivëlla apo si një paralele dramatike edhe me atë që po ngjet në qendër të Tiranës mes dy partive dhe dy liderëve kryesorë…
Vëllavrasja e parë u krye me armë apo me dru pas koke, në gjaknxehtësi, e dyta me fjalë, me sharje, me shpifje, me akuza e kundërakuza, me gjakftohtësi, me greva urie, me bllokim rrugësh dhe institucionesh, me mitingje e kundërmitingje, me peticione e kundërpeticione…Në të dy rastet synohet të garantohet sa më shpejt eliminimi i vëllait nga vëllai, i pari për pronën, i dyti për karrige…
Ku është ndryshimi?

***
Është e vërtetë, sot na tërheqin vëmendjen më së tepri fjalërimet e Saliut nëpër konferenca shtypi për rritjen e paparë ekonomike, për grevën apo për kryetarin e opozitës, dhe anasjelltas, se sa një vrasje e tillë makabre, qoftë edhe e përmasave të Gërdecit…Prandaj, kjo qasje ndaj dukurisë së shtuar të krimit apo ca më gjerë ndaj krizës, nuk e natyralizon e nuk thjeshtëzon dot gjendjen tonë absurde, aq më pak e justifikon këtë rënie të thekshme morale, këtë politikë drumepre që asnjëherë nuk hakatet të kërkojë arsyen dhe shkaqet përse ne shqiptarët nuk po dalim dot nga qorrsokaku i tranzicionit, përse jemi bllokuar në procesin e integrimit, përse e kemi kaq të kollajtë që një vëlla të vrasë vëllanë për hiçmosgjë apo si thuhej qëmoti, ‘për mustaqet e Çelos!’…

Mesa duket, kur një shoqërie i vritet shpresa, nuk bëkan më përshtypje vrasjet si kjo e dy vëllezërve…Madje nuk të mbresëlon as greva e urisë para zyrës hijerëndë të Kryeministrit! Kjo është pasqyra e vetëdijes dhe e reagimit tonë qytetar: imunitet, pandjeshmëri, moskokëçarje, mjaft që e keqja dhe fatkeqësia të jenë jashtë mureve të shtëpisë tonë…

Këtë theqafje morale e ka realizuar plotësisht politika jonë “pluraliste” në këto 20 vjet! Ky është i vetmi sukses i saj e këtë hak nuk duhet t’ua hamë krerëve tanë!

Fakti që shtëpitë dy vllaznit dibranë i paskan pasur, si gjithë ata që jetojnë në fshat, pranë njëri-tjetrit, tregon se tokën e trashëguar, pas përmbysjes së monizmit, ata e patën ndarë mes njëri-tjetrit, sigurisht me pakënaqësi dhe jo me mirëkuptim, gjë që do të thotë se njëri syresh do të jetë treguar më tahmaqar, më “i fortë”, më grabitqar, më hileqar se tjetri…Jo, kjo nuk mund të quhet marrëzi, as çmenduri, as lajthitje, por një “barbari demokratike” apo më troç: degradim i lirisë në demokraci, një shfytyrim skajor i moralit, i bashkëjetesës, i dinjitetit, i nderit, një shkërbërje e njeriut nga njeriu prej frikës e panikut të kallur në këto vite të vështira prej skamjes, prej nepsit dhe makutërisë për t’u bërë sa më shpejt e sa më kollaj i pasur!…
Ky është kurthi në të cilin kemi rënë pak a shumë të gjithë. Një shoqëri e tillë pa rregulla, me ligje që nuk zbatohen, që vetorganizohet me vetëgjyqësi, nuk mund të jetë veç e tillë: domatet e mbjella te bahçja e tjetrit, qoftë edhe e vëllait të një gjaku, të merrkan jetën!

Një vajzë që nuk pranon të fejohet me ty, mund të vritet në mes të klasës!
Ja përse këto nuk kanë për të qenë rasti i parë dhe as i fundit: sepse ne nuk e shohim hallin kombëtar e shoqëror në sy!

Tani askush nuk tronditet kur djali vret babanë, ose nënën; kur babai vret djalin; kur gruaja ther burrin me thikën e bukës; kur kushëriri qëllon me armë kushëririn; kur fqinjin poshtëron fqinjin dhe pastaj vret edhe motrën, edhe vëllanë.
Jetojmë mbi një tokë të vaditur me rrëke gjaku, mbi një gjak të derdhur më së shumti kotekot, mbi një gjak të shprishur prej babëzisë dhe frikës së fukarallëkut…Ndër ne ka jo pak që të marrim gjak në vetull për një gërvishtje makine, për një vijë uji a rrip toke të zaptuar, për një ofendim, për një fjalë të tepërt, për një parakalim makine, për një tejkalim shpejtësie, për një hakmarrje a gjakmarrje të lënë trashëgim nga etërit a gjyshërit pa u marrë, për një simpati a antipati për kryetarin e partisë…Me një fjalë për një hiçmosgjë!…

A thua jeta e njeriut të jetë zhvlerësuar vetvetiu, për shkaqe thjesht kulturore apo, si thonë disa, meqë ne si popull “kemi kulturë të vakët demokratike”? Jo, nuk është kjo, sepse edhe kur kemi pas qenë më të varfër, edhe kur kemi jetuar në regjime shtypëse, edhe kur na drejtonte Kanuni, jeta e njeriut kishte më tepër vlerë!

Ku po shkojmë kështu?
***
Mjerisht, edhe pse kemi me qindra OJF, kemi qeveri, kryeministër, opozitë, President Republike, kemi madje edhe Kuvend, edhe Kushtetutë, edhe Akademi, edhe ALUIZN, edhe INSTAT, edhe ligj të posaçëm për pronat e për mbrojtjen e pronës; edhe pse jemi në një proces të pafund legalizimesh, kthim-moskthim pronash, dhënie-mosdhënie kompensimesh, etj….ne nuk kemi të shifra të sakta, statistika zyrtare, studime e natyrisht edhe masa parandaluese për gjithë këto sherre, vrasje e krime të pafundme e të përditshme që kryhen herë brenda, herë jashtë familjes, si brenda dhe jashtë shtetit, natën dhe ditën për diell!

Vetëm në këto raste, të kthim-moskthim të pronës, vrasësi çuditërisht nuk ikën në drejtim të paditur!

Tani jo vetëm organizmat shtetërore, pushteti lokal e ai qendror, po edhe opinioni publik është imunizuar nga këto lajme tragjike, nga kjo gjakderdhje masive e motivuar për një shtyrje të gardhit, dukuri që, bashkë me vetëvrasjet, rrahjet, sherret, plagosjet dhe aksidentet në punë e në rrugë, janë bërë më se të rëndomta…
Nuk ka e nuk mund të ketë kurrkund krizë më të rëndë se sa kur jeta e një njeriu vlen sa një rrënjë domatesh! Askush nuk dëshiron që kjo të jetë fytyra e shoqërisë tonë…Nëse dikush tronditet, e sigurt është që pas këtyre lajmeve ogurzeza pakkush bën përpjekje të zbulojë pse-në, të kërkojë ilaçin, shkakun e vërtetë të krimeve: është varfëria, është lëmshi i bërë me pronat apo kriza e thiktë morale që i detyron njerëzit të mos kenë pikë besimi te Ligji, te Drejtësia, te organet shtetërore? Partitë e qeveritë nuk e bëjnë qejfin qeder, apo të bëjnë sikur…Sepse në të vërtetë krerët tanë kanë vetëm një hall: si të marrin e si të mos e dorëzojnë kurrë pushtetin! Drejtuesit tanë nuk kanë as bindje, as mend dhe as dëshirë të përpiqen të minimizojnë këtë zezonë mbarëkombëtare që po e zhbën kombin. Kush ka qenë në pushtet, i majtë apo i djathtë, litarin e fantazmës “pronë” dhe sherr e ka lënë qëllimisht jashtë, jo vetëm me ligjin e famshëm 7501 të vitit 1991 apo me ligjin nr. 9235 të vitit 2004, disa herë i ndryshuar, por edhe me procesin e legalizim-moslegalizimit, të kthim-moskthimit të pronave, të dhënie-mosdhënies së kompensimeve, të një vendi pune etj, por edhe me kriminelët e të fortët që përherë ikin në drejtim të paditur!…
Sepse vetëm kështu, pra duke u hasmosur kësisoj vëllai me vëllanë, fqinji me fqinjin, i ardhuri me autoktonin, urrejtja dhe inati nuk mund na lejojnë të shohim matanë hundës se si po qeveriset katundi nga kryeplaku; pra, një njeri i terrorizuar, që lufton për mbijetesë, nuk është në gjendje të vështrojë matanë gardhit, pas sinorit, prapa murit, madje as se ç’po bën prifti apo hoxha i fshatit…Vetëm kështu mund të sundohen njerëzit më lehtë e më gjatë! Vetëm kështu, kur njeriu detyrohet të vrasë vëllanë, a ka ndonjë rëndësi fakti se cili është ai që na tërheq për kapistalli? A ka burrë që, pasi detyrohet të vështrojë përditë vdekjen në sy të preket e revoltohet kur në Ballshin e largët helmohet gati i gjithë qyteti?

A ka militant që prej zellit e verbërisë partiake të mos jetë i gatshëm të urrejë e të poshtërojë kotekot vëllanë, pas kësaj të vrasë mendjen e mandej edhe të kuptojë qartësisht se si po na qeveris e ku po na drejton ai/ata që aktualisht kanë pushtetin?

Përgjigja e kësaj pyetje i kapërcen kufijtë e krimit!

Nuk lipsen as sy dhe as veshë për të kuptuar se vëllavrasja tek ne quhet politikë e mençur, e suksesshme dhe natyrisht edhe dobisjellëse…Për këtë mjafton të ndjekësh vetëm një edicion lajmesh, në cilindo kanal televiziv shqiptar!

Nga Kiço Blushi, G. Shqiptare

7 gjëra që nuk duhet t’i bëni kurrë në Facebook

Faqja e “MSN”-së duke marrë në konsideratë përhapjen e shpejtë të përdoruesve të rrjetit social të “Facebook”-ut, dhe duke u nisur nga kritikat e shumta që i bëhen këtij rrjeti për mungesën e privacisë, ka publikuar dje 7 këshilla për përdoruesit e “Facebook”ut”

1. Së pari ju nuk duhet të përdorni një fjalëkalim të butë.
Duhet të shmangni emra apo fjalë të cilat mund të gjenden lehtë në fjalor, përveç kur ato i kombinoni në numra në fund, në mes apo edhe më simbole. Një fjalëkalim duhet të ketë së paku tetë karaktere. Një teknikë e mirë është të fusësh numra dhe simbole midis fjalëve, siç është për shembull ky variant: hO27usEs!.

2. Së dyti ju nuk duhet të lini në profilin tuaj ditëlindjen e plotë.
Ky element mund të shfrytëzohet nga njerëz të cilët duan të marrin të dhënat tuaja për ti përdorur më pas në mënyrë të alternuar për të patur akses në llogarinë bankare apo kartat e kreditit. Nëse ju e keni përfshirë datëlindjen e plotë atëherë shkoni tek profile, klikoni mbi “edit information”. Tek opsionet vendosni që të duket vetëm muaji apo dita dhe jo e gjithë datëlindja.

3. Së treti duhet të menaxhoni me kujdes privatësinë e profilit tuaj.
Për gjithçka në profilin tuaj në FB ju mund të limitoni aksesin vetëm tek miqtë apo miqtë e miqve. Një regjim strikt duhet përdorur për fotot, ditëlindjen, pikëpamjen fetare, informacionet familjare mes gjërave të tjera. Ju mund ti jepni vetëm grupeve të njohura akses tek fotot dhe mund të bllokoni persona të veçantë që ti shohin ato.

4. Së katërti mos lejoni që të vendosni emrat e fëmijëve tuaj në fotot e ndryshme. Nëse dikush tjetër e bën këtë mund ta fshini me “remove tag”. Nëse fëmija juaj nuk është në FB dhe dikush e përfshin emrin e tij i kërkoni personit që ta heqë.

5. Së pesti mos tregoni faktin se nuk jeni në shtëpi dhe se ajo është bosh. Prisni derisa të ktheheni për tu treguar miqve se si kaluat me pushime.

6. Së gjashti keni parasysh opsionin e makinës kërkuese. Për të ndihmuar që të huajt të mos kenë akses mbi faqen tuaj, shkoni tek menuja “Search” tek “FB privacy” dhe selektoni “Only Friends for FB search results”. Sigurohuni se kutia për kërkimin publik nuk është e klikuar.

7. Së shtati evitoni të vegjlit të përdorin FB pa mbikëqyrje. Limiti i FB është mosha 13 vjeç por fëmijë edhe më të rinj duket se e përdorin atë. Nëse keni një fëmijë të vogël apo një adoleshent në BF, mënyra më e mirë për ta mbikëqyrur është ta keni mik. Përdorni adresën tuaj të e-mailit si kontakt për llogarinë e tij në FB në mënyrë që të merrni informacionet e nevojshme rreth aktivitetit të tij.

Denisa Spaho, T. Observer

PD: Propozimi i Ramës, antiligjor. PS: Berisha dëgjo ndërkombëtarët

Partia Socialiste ka reaguar pas deklaratës së kreut të grupit parlamentar të PD-së, Astrit Patozi, duke e këshilluar mazhorancën të dëgjojë zërin e arsyes dhe të ndërkombëtarëve për zgjidhjen e krizës.


"Ju zotëri nuk mund të ndalonin transparencën, nuk mund ta ndaloni hapjen e kutive, nuk mund ti shmangeni një zgjidhje në të mirën e vendit. Ju nuk na zmbrapseni dot, as me presione, as me shurdhëri dhe as me justifikime qesharake, që po bëhen përditë e më të neveritshme përballë qëndresës sonë stoike"- tha deputeti i PS-së, Eduart Shalsi.


Sipas Shalsit, të gjithë e kanë kuptuar se kjo opozitë ka një shpirt të pathyeshëm. Forca, fuqia, energjia e opozitës qëndron tek e vërteta dhe vetëm tek e vërteta e cila ne bëjmë dhe e cila po forcohet përditë, falë mbështetjes së jashtëzakonshme popullore.


"Zotërinj dëgjoni zërin e arsyes, dëgjoni zërin e miqve dhe partnerëve tanë ndërkombëtarë, miqve të Shqipërisë, sa nuk është vonë. "Hapni kutitë ose largohuni" Kjo protestë nuk ndalet, kjo protestë nuk mbaron veçse duke fituar. Kauza jonë nuk mund veçse të fitojë"- tha ai.



Patozi: Propozimi i Ramës për fletët e votimit, antikushtetues
Kryetari i grupit parlamentar i PD-së Astrit Patozi e ka quajtur propozimin e kreut të PS-së Edi Rama për shqyrtimin e materialeve zgjedhore në Venecia si antikushtetues.


Gjatë një deklarate për mediat, ai theksoi se hapja e kutive të materialit zgjedhor është në kundërshtim me kodin zgjedhor.


"Propozimi i kreut socialist Rama kreu hapjen e kutive të materialit zgjedhor bie në kundërshtim flagrant me kodin zgjedhor"- tha ai, duke shtuar se Gjykatës nuk i bëhet presion me greva urie.


__________


Berisha nuk pranon zgjidhjen e krizës: Bosch trillon, nuk ka asnjë draft

Kryeministri Berisha ka refuzuar dje ofertën e bërë nga komuniteti ndërkombëtar për zgjidhjen e krizës. Ai ka pohuar se nuk do të pranojë asnjë zgjidhje të tillë që parashikon hapjen e kutive, qoftë edhe ato të materialeve zgjedhore. Madje, kryeministri Berisha ka nisur sulme personale drejt ambasadorit të OSEB-së, Robert Bosch, duke e cilësuar si gënjeshtar dhe duke thënë për ofertën e tij: Është gënjeshtër e bazuar mbi mashtrimin dhe trillimin.


Në mënyrë absolute është gënjeshtër që ka në bazë mashtrimin. Këtë e them për të hequr çdo lloj aludimi.
Ai ka shpjeguar se në asnjë rast nuk do të pranojë Komisionin e Venecias si organ këshillimor për këtë çështje.


Sipas tij, kjo gjë është ofruar edhe më parë, por është kundërshtuar nga presidenti Topi dhe ai vetë. Kryeministri i ka bërë thirrje kreut të opozitës që të zbatojë ofertat e bëra nga Byroja Parlamentare e Këshillit të Europës dhe Komiteti Presidencial.

Berisha:


Gjatë këtyre dy ditëve, kam dëgjuar të flitet, të shkruhet, për këtë jam informuar aty ku isha, për pakte, drafte etj. Ju garantoj me përgjegjësinë më maksimale se në tryezën time, në mënyrë absolute dhe kategorike, nuk ekziston as edhe një draft tjetër, as edhe një pakt tjetër, as edhe një dokument tjetër, nga askush dhe nga asnjë institucion europian apo perëndimor, për këtë problem.


Më duhet t'ju rikujtoj se Bashkimi Europian në mënyrë të përsëritur ka bërë të qartë se këtë çështje duhet ta zgjidhin shqiptarët dhe unë e kam përshëndetur dhe e përshëndes këtë qëndrim dhe e garantoj BE-në dhe çdo vend tjetër, çdo institucion tjetër se në Shqipëri ekzistojnë të gjitha mekanizmat e shtetit ligjor, mjafton respektimi i tyre, për t'i dhënë përgjigjen më të mirë këtij problemi dhe çdo problemi tjetër.


Gjithçka tjetër jashtë kësaj që thashë, është gënjeshtër e bazuar mbi mashtrimin dhe trillimin. Në mënyrë absolute është gënjeshtër, që ka në bazë mashtrimin.


Këtë e them për të hequr çdo lloj aludimi. Në tryezën e Presidentit të Republikës, Komiteti Presidencial ka sugjeruar që të ngrihet komisioni, ndërkohë ka sugjeruar se mund t'i drejtohemi Komisionit të Venecias. Ishte Presidenti i Republikës, ai që kundërshtoi në mënyrë kategorike dhe natyrisht, unë e mbështeta.


Kryeministri i vendit nuk mund t'i drejtohet Komisionit të Venecias për vendimet e gjykatave të vendit, sepse ai mbart një pjesë të sovranitetit të vendit, si përfaqësues i mazhorancës.


Por, edhe gjykatësit, me Kushtetutën e vendit, mbartin një pjesë të sovranitetit, të cilën Kryeministri është i detyruar ta respektojë gjer në fund dhe jo të shkojë t'i padisë poshtë e lart. Kjo është e vërtetë absolute edhe për Presidentin e Republikës, edhe për Kryetarin e Parlamentit.


Ai që ka ankesë, është ai, i cili mund t'i drejtohet Gjykatës Kushtetuese, e cila, në ligjet e këtij vendit, të shkruara nga Partia Socialiste, në Kushtetutën e vendit është shpallur si garante e Kushtetutës. Pra, kemi një vendim të Gjykatës Kushtetuese dhe zoti Rama, në rast se dëshiron, mund t'i drejtohet kësaj Gjykate, e cila është e vetmja që, në respekt të sovranitetit të vendit dhe të Kushtetutës, ka tagrin të kërkojë mendim amicus curiae apo opinion për qëndrimin e vet.


Unë nuk mund të dërgoj vendimin e Gjykatës Kushtetuese për të mos u hetuar Edi Rama, vendim të cilin, Gjykata e ka zbardhur para dhjetë ditësh. Nuk më pëlqen vendimi, por jam i detyruar ta respektoj.


Edhe unë mund të doja ta dërgoja diku këtë vendimin për ta rrëzuar, por nuk më shkon në mendje ta bëj këtë. Kuadri ynë kushtetues e ligjor është kuadri kushtetues e ligjor i një vendi demokratik. Spekulimet dhe spekulatorët nuk kanë asnjë hapësirë dhe nuk do të mund të kenë. Ndaj Komisioni Europian dhe Këshilli i Europës kanë përcaktuar qartë transparencën, në përputhje me Kushtetutën e vendit. Ne, absolutisht, mbetemi të hapur për dialog dhe diskutim.


Ne mbetemi të hapur të zbatojmë me përpikëri të gjitha detyrimet tona, në përputhje me Kushtetutën e ligjet, vendimet e gjykatave, për dhënien fund të kësaj situate. Sikundër mbetem i vendosur të respektoj kampingun e ngritur në dyert e kryeministrisë, për sa kohë zoti Rama do të dojë ta mbajë. Kjo është në tagrin e tij. Protestat paqësore do të kenë vetëm respekt. Me këtë rast, dua të përgëzoj policinë për shkallën e lartë të profesionalizmit, të përgjegjësisë dhe në përputhje të detyrës.


Zoti Kryeministër, ju thatë se nuk ekziston një draft marrëveshje, por si e komentoni ju deklaratën e ambasadorit të OSBE-së, Robert Bosch, nëse i referohen edhe ai deklarimeve të Komitetit Presidencial të Këshillit të Europës dhe ndoshta edhe Byrosë Parlamentare të Asamblesë Parlamentare të Këshillit të Europës dhe a keni pasur presion nga ndërkombëtarët për ta zgjidhur këtë çështje?



Së pari, kërkoj mirëkuptimin tuaj. Kryeministri në axhendën e tij nuk ka komentet e deklaratave të ambasadorëve. Të jem i hapur me ju, kjo nuk është në axhendën time dhe në tërësi, ju e dini se unë nuk e kam bërë këtë ndonjëherë. Edhe kur ka rastisur që ndonjë diplomat të ketë bërë diplomacinë e megafonit, unë po këtë gjë kam deklaruar, që nuk bëj diplomaci megafoni, sepse nuk më duket se vlen.


Por, në tërësi axhenda ime përjashton nga komentet deklaratat e diplomatëve. Unë këtë praktikë ndjek. Ajo çka thashë dhe që është e vërtetë e padiskutueshme, është se nuk kam parë dhe nuk kam mbi tavolinën e zyrës asnjë draft apo pakt, por kam deklaratën e Këshillit të Europës, deklaratën e Komisionit Europian, kam kërkesat e parashtruara ndaj meje, gjatë vizitës sime në Bruksel, të cilat i kam bërë transparente, bashkë me zyrtarët më të lartë të Brukselit, në konferencë për shtyp.




Zoti Kryeministër, ju thoni që nuk keni draft në tryezën tuaj A do të pranonit, në rast se do të vinte një draft që do të kërkonte hapjen e kutive të materialeve zgjedhore, a do të diskutonit mbi këtë pikë?



Në tryezën time kam dokumentet ndërkombëtare, kam deklaratën e Byrosë Parlamentare, të Komitetit Presidencial të Këshillit të Europës, institucione këto thellësisht të balancuara majtas dhe djathtas, madje Komiteti ishte më shumë majtas, se djathtas, si dhe deklaratën e Komisionit Europian, i cili është një institucion thellësisht i balancuar. Jam i gatshëm, mbi këto dy dokumente dhe komisioni që kemi ngritur, të punoj plotësisht.


Të garantoj se asgjë nuk mund të zëvendësojë Këshillin e Europës dhe kjo për këto arsye: Së pari, nuk duhet të harroni që ky institucion është themeluar mbi zgjedhjet e lira. Kriteri i parë më themelor i tij, në vitin 1949, kanë qenë zgjedhjet e lira, kur është bashkuar një grup vendesh që bënin zgjedhje të lira. Së dyti, Shqipëria është në monitorimin e këtij institucioni dhe kjo është reale.


Së treti, ky institucion miratoi një rezolutë, të cilën e përshëndetën pozita dhe opozita. Nuk është kurrë në moralin tim, që të të pranoj për kryeplak dhe të të rruaj mjekrën. Këtë mund ta bëjnë të tjerët, por jo unë. Unë fjalën e kam fjalë. Ky është qëllimi im. Komisioni Europian ka deklaratat e tij, të përsëritura, të cilat unë i kam pranuar plotësisht.



Zoti Kryeministër, ju thoni që nuk komentoni mbi deklaratat e ambasadorëve të huaj. Por, a u ndjetë ju i habitur kur dëgjuat ultimatumin e ambasadorit Bosch, që në tryezën tuaj dhe të zotit Rama ndodhet një draft, të cilin ju do ta firmosni. Dhe e dyta, pak ditë më parë, zoti Topi ka dekretuar tre emra për në Gjykatën Kushtetuese. A do t'i votojë mazhoranca këto tre kandidatura?



Edhe njëherë, dua të theksoj se unë i respektoj shumë ambasadorët, gjithnjë në proporcion me respektin që ata tregojnë për vendin, institucionet, standardet demokratike të tij. Sepse, unë nuk them se kam miqësi personale me këtë apo atë, edhe mund të kem, ka pasur raste që kam, nuk përjashtohet mundësia. Kështu që qëndrimi im është ky që thashë. Ajo që unë ju siguroj është se në tryezën time, përveç dy dokumenteve, propozimit të komisionit dhe Këshillit të Europës, ekziston zero dokument tjetër. Për më gjatë mund të të sqarojë zoti Edi.


Zoti Kryeministër, unë do insistoja dhe njëherë tek deklarata e ambasadorit të OSBE-së, zotit Bosch. Kë duhet të besojmë, duhet t'ju besojmë juve që pohoni të kundërtën, apo deklaratën e ambasadorit?


Se ku e vendos ti besimin, tek unë, në çadër, apo tek ambasadori Bosch, ajo është çështja jote. Unë do të respektoj besimin tënd, zgjedhjen e bën vet ti.




Zoti kryeministër, në rast se vjen një propozim nga PS-ja për konsensus, duke kërkuar transparencë nëpërmjet hapjes së kutive të materialeve zgjedhore, ju jeni dakord? A ka vend për diskutim tek kjo çështje apo kjo është çështje e mbyllur?



Ky është vend i shtetit ligjor. Ligjet e tij kanë përcaktuar, Kodi Elektoral, një nga Kodet më të mrekullueshme të vendit, ka përcaktuar çdo gjë, për kutitë e materialeve, për kutitë me fletë votimi, për fletët e votimit, mjafton ta zbatojmë atë, që do të thotë se nuk ka nevojë t'i themi njëri-tjetrit faleminderit për asgjë. Të zbatojmë ligjet dhe kaq. Kemi krijuar një komision, zbatojmë ligjet. Nuk mund të them asgjë, nuk jam unë anëtar i atij komisioni, unë jam Kryeministri që kërkoj të zbatohen ligjet.


Ligji i ka të përcaktuara të gjitha. Ne jemi shtet ligjor. Në arkivin e PD-së ekzistojnë të gjitha procesverbalet, të gjitha tabelat, sepse ligji ua jep komisionarëve, ua jep ligji të gjitha. Ne jemi të gatshëm të zbatojmë çdo përcaktim ligjor. Kjo është përgjigja ime.



Oferta e mbështetur nga ambasadorët e OSBE-së, BE-së, dhe SHBA-së


1. Të krijohet komisioni hetimor parlamentar ku shumicën e anëtarëve ta ketë opozita.
2. Kryetarin e komisionit hetimor parlamentar ta ketë opozita.
3. Komisioni hetimor parlamentar të ketë fuqi të hapë kutitë e materialeve zgjedhore
4. Komisioni hetimor parlamentar të hetojë materialet zgjedhore (të gjitha materialet që ndodhen në kutitë e votimit me përjashtim të fletëve të votimit)
5. Në rast se vihen re parregullsi në votim, Komisioni hetimor parlamentar t'i drejtohet Komisionit të Venecias për të vendosur hapjen e kutive përkatëse të votimit.


Roberty Bosch për krizën


"Ajo që dua të them është se, që dje, ka një kompromis shumë të mirë mbi tryezë dhe në emër të shumicës së ndërkombëtarëve do t'i inkurajoja udhëheqësit politik të pranojnë kompromisin tani; të tregojnë kurajë; të tregojnë se janë burra shteti; të mos përpiqen të shmangen duke përdorur teknikalitete; të shikojnë interesin e vendit të tyre. Mos vini të parat interesat tuaja personale dhe bëni hapin e madh!


Koha është tani! Nuk do të ketë më kohë për t'u zgjatur! Nuk do të them se cili është kompromisi.


Liderët, të cilëve unë po u drejtohem, e dinë shumë mirë cili është kompromisi dhe është një kompromis shumë i mirë që duhet pranuar. Ky kompromis ka mbështetjen e Bashkimit Europian, të Shteteve të Bashkuara të Amerikës dhe OSBE-së. Ai vërtet duhet pranuar"





G. Shekulli

Fati

Arbëreshi i parë iku nga pushtuesi turk
Shqiptari i dytë nga diktatura staliniste
I treti nga “barazia” titiste
I katërti nga demokracia shqiptare
I pesti nga diktatura serbe
I gjashti nga demokracia kosovare
I shtati stërvitet për t´i braktisur pampersdemokracitë tona
T´i bashkëngjitet arbëreshit të parë, shqiptarit të dytë, të tretë, të katërt, të pestë dhe të gjashtë!

Për gjashtë ditë Zoti krijoi universin
Të shtatën pushoi
Për gjashtë ditë vendi gate zbrazet
Edhe të shtatën shqiptari me strajcë në dorë!

* Në librin “Me shqiptarët e Turqisë”, Fatmir Selimi. studiuesi shqiptar nga Kosova, pas dhjetë vjetëve kërkime në Turqi, konstaton se atje jetojnë 10-15 milion shqiptarë...
Lufta e Kosovës dëshmoi se ata nuk ndjehen më shqiptarë...

Sikur Turqia të na kishte dashur më pak, do t´ishim mbi 15 milion shqiptarë në Ballkan: Lufta e Kosovës nuk do të kishte ndodhur kurrë dhe shteti Shqiptar, do t´ishte ndoshta më i madhi në Ballkan...

Naser Aliu

Paloka për protestën: Dje pamë shfaqjen e trupës teatrale ambulante

Deputeti i PD-së, Edi Paloka ka ironizuar protesën e djeshme të PS-së, duke quajtur atë shfaqje teatrale ambulante. Ndërkohë I ka bërë thirrje PS-së t'I zhvendosë çadrat në trotuarë në mënyrë që të zhbllokohet trafiku.

Në fjalën e tij tha: "Dje pamë shfaqjen më të fundit të trupës teatrale ambulante. Mesa duket në programin e fundit teatror ka vendosur të luajë filma me heroizma partizane, në disa udhëkryqe të Tiranës dhe kryesisht në Bulevardin e Dëshmorëve të Kombit". Shokët e njësitit gueril të spitalit Infektiv na paskan habitur edhe mjekët me gjendjen e tyre perfektë shëndetësore, jo shpirtërore", kështu u shpreh Paloka për grevistët socialistë.

Ndërsa shtoi se "do ta kishim vlerësuar këtë shfaqje në të gjithë komponentët e saj nëse nuk do kishte penguar seriozisht qytetarët e Tiranës për të kryer punët e tyre të përditshme. Si politikan por edhe si qytetar i Tiranës, në mënyrë që të vazhdojmë të shikojë shfaqjen e përgatitur me kujdes, do t'i ofroj një kompromis çunave të bllokut që kërkojnë zyrat e babit, të zhvendosin çadrat në trotuar dhe të mos pengojnë qytetarët.

Partia Demokratike ka akuzuar sërish sot kreun e PS-së Edi Rama, për bllokim të shërbimit shëndetësor në cadrat e grevistëve, duke përsëritur se në këtë mënyrë shkelen të drejtat të Konventës së Gjenevës.

"Sot u bënë plot 13 ditë që Edvin Kristaq Rama, Gramoz Ruci, Ilir Xhelil Gjoni, Dashnor Myslym Peza bllokojnë shërbimin zyrtar shëndetësor duke e trajtuar kampin e vendosur në bulevardin e kombit si një bodrum apo shpellë ku mund të hyjnë vetëm të besuarit e kumbarës. Ky akt i bllokimit të shërbimit zyrtar shëndetësor në cadrat e burgut Rama - Ruci është një dhunim flagrant i të drejtave ndërkombëtare, i Konventës së Gjenevës dhe Vendimeve të Strasburgut mbi trajtimin e të burgosurve, robërve dhe grevistëve të urisë", - tha Mëhilli.


Shekulli

Injorantët me diploma

Të flasësh mbi fenomenin e universiteteve private tashmë është kthyer në sportin e preferuar të çdo biznes-akademiku që synon legjitimimin e statusit të tij duke konservuar të vërtetat e kulluara nëpërmjet pohimit dhe ripohimit të realitetit si të tillë.

Në këtë drejtim roli i biznes-akademikut është qartësisht i kuptueshëm, pasi pohimi i së vërtetës aktuale shënon saktësisht krijimin e identitetit të studentit të universitetit privat, gjë që është një rrjedhojë logjike e ekzistencës së akademikut biznesmen. Deri këtu çdo gjë është në vendin e vet. Por në momentin që krijohet pohimi i vetë studentit të universitetit privat si pohim për veten e tij, këtu racionalja rrudhet për t’u katapultuar edhe një herë në zonën ku absurditeti është në shtëpinë e tij. Figura e studentit si shtresa sociale më progresiste e fundit të viteve ‘60 gjatë protestave të studentëve në perëndim, ka krijuar shëmbëlltyrën e saj në Shqipërinë e shekullit XXI. Kur trajtohen problemet në lidhje me përgatitjen intelektuale të studentit shqiptar kryesisht faji i vihet mbizotërimit të universiteteve private të dekadës së fundit. Në këtë shkrim do të trajtohet çështja se si këto universitete nuk janë shkaktare, por janë pasoja të mjerimit intelektual të studentit shqiptar, gjë që siç do të argumentohet në vijim, prodhon një student privat brenda një institucioni me mision publik. Dimensioni i parë që evidenton këtë pikëpamje shfaqet në rrafshin ekonomik.

Në momentin që individi derdh kuotën e tij prej 2000 eurosh (a më shumë) në një universitet privat, ai bëhet automatikisht student i këtij universiteti. Pikërisht në këtë moment na shfaqen dy çështje thelbësore: së pari, pas derdhjes së shumës përkatëse, paratë e paguara si një mjet këmbimi, studenti i ka shkëmbyer me dijen që do t’i servirin për konsum. Së dyti, që në momentin e derdhjes së shumës, studenti do të marrë një vlerë fillestare të cilën pas përfundimit të studimeve dhe daljes në tregun e punës do të kërkojë ta barazojë dhe më pas ta tejkalojë në varësi të vlerës së këmbimit të diplomës së tij. Nga këtu dalim në përfundimin se meqë studenti pas derdhjes së parave konsumon dijen që i serviret, atëherë sikurse pagesa e tij përbën vlerën e tij fillestare (të cilën që nga këtu do të emërtohet jo rastësisht si “vlera e prodhimit”), po kështu dija që i serviret atij përcakton vlerën e tij të këmbimit në treg, dije kjo e cila funksionon vetëm në varësi të vlerës së prodhimit të studentit.
Nga ana tjetër sa më i lartë të jetë hendeku mes vlerës së prodhimit të një studenti dhe vlerës së këmbimit te tij në treg, aq më e lartë është vlera e atij studenti, por që mundësia është e lartë që tregu të mos i japë studentit një vlerë këmbimi dhe si rezultat ai mbetet i papunë rrjedhimisht në pamundësi për ta barazuar vlerën e tij të prodhimit. Për paralelizëm mjafton të përfytyrojmë një biznes në të cilin që të nxirret fitim duhet investuar paraprakisht një kapital fillestar, vlera e të cilit do të kompensohet vetëm pas disa vitesh, por që mundësia e falimentimit është tepër e lartë. Kjo është situata e studentit të sotëm në universitetet private.
Pra nuk është thjesht çështja se universitetet janë shndërruar në biznese, por që studentët janë pikërisht ata që e bëjnë të mundur fitimin e këtyre bizneseve nëpërmjet shndërrimit të qenies së tyre në biznese të gjalla.
Në këtë drejtim studenti dhe biznes-akademiku duke u shndërruar në një gjë të vetme i japin fund dialektikës së tyre individuale. Pra është e qartë se përbrendësimi që i bën universiteti si pohues i të vërtetave të kulluara studentit si mohues të këtyre të vërtetave është saktësisht origjina e këtij problemi. Rrjedhimisht në këto kushte nuk mund të flitet më për universitetin e studentëve por vetëm për studentë universitarë, domethënë studentë që i përshtaten mjedisit ku vegjetojnë (ashtu sikurse bëjnë gjallesat shtazore).

Kriza e studentit shqiptar nuk buron së jashtmi (si p.sh nga sistemi arsimor) por ajo është një krizë e brendshme si rezultat i shpërbërjes së identitetit të tij nga esenca fillestare (dija).
Po t’i hedhim një sy autorëve më në zë të politikave identitare si Hobsbaum apo Barth mësojmë se identiteti në fakt nuk është një e dhënë e përjetshme por ai krijohet, ashtu si gjithçka tjetër. Formimi i një identiteti vjen si rezultat i kundërvënies së tij subjektive ndaj të vërtetave dominuese. Kësisoj identiteti është në vetvete një mohim. Një mohim ndaj rrethanave të jashtme në mënyrë të tillë që t’ia përshtasë vetes këto rrethana. Sipas këtij këndvështrimi biznes-studenti shqiptar jo vetëm që nuk do të ishte një mohim ndaj të vërtetave dominuese por realisht ai do të ishte një mohim i vetvetes. “Unë dua vetëm një mesatare të lartë” do të thoshte dikush, “në fund të fundit mua tregu këtë më kërkon”. Po t’i referohemi iluminizmit gjerman, ky lloj vullneti do të ishte saktësisht vullneti i skllavit. Në bazë të kësaj logjike studenti nuk duhet kurrsesi t’i përshtatet tregut (këtij të jashtmi që shkakton tjetërsimin e identitetit studentor) por përkundrazi ai duhet që kërkesat e tregut t’ia përshtasë vetes. Kjo do të ishte me pak fjalë vullneti i njeriut të lirë i evokuar aq fuqishëm nga studentët e 68’-ës në perëndim të cilët sollën një emancipim aq të rëndësishëm në art, kulturë, filozofi, të drejtat e njeriut dhe mbi të gjitha të grupeve të marxhinalizuara të shoqërisë. Një ndër faktorët kryesorë që e tjetërson studentin nga esenca e tij (dija) është instrumentalizimi i notës. Nëpërmjet këtij instrumentalizimi dija nuk është më e studentit, dija i përket tregut sepse realisht janë sipërmarrësit që caktojnë kuotën e dijes të kërkuar ndaj studentëve që duan të punësojnë dhe në këtë pikë dëshira e vetme e studentëve kufizohet vetëm e vetëm tek përshtatja ndaj tregut. Duan t’i përshtaten tregut në mënyrë të tillë që nota që morën të shkëmbehet sa më shtrenjtë në treg. Kjo situatë favorizohet edhe më tej nga paaftësia e studentëve për t’u bashkuar ashtu sikurse në të shkuarën, në të njëjtin grup social. Dyzimi që u është bërë identitetit të tyre social ka ndikuar që studentët të mos jenë më NJE në promovimin e të drejtave të tyre si një prej grupeve të marxhinalizuara të shoqërisë. Dhe këtu vijmë në dimensionin e dytë që është ai social. Duhet thënë se së bashku me mbizotërimin e universiteteve private është formuar gjithashtu një grup i ri social brenda grupit te studentëve, bëhet fjalë për grupin e nouveaux riches ku përfshihen të gjithë ata që vendin e punës e kanë siguruar paraprakisht falë sistemit të tarafeve, por që kanë nevojë për një copë letre për ta justifikuar këtë vend pune. Këtu bëjnë pjesë edhe ajo kategori që nuk kanë nevojë për dijen për të përcaktuar vlerën e tyre të këmbimit por përkundrazi në rastin e tyre është vlera e këmbimit (fakti që bëjnë pjesë në një familje të pushtetshme në vend) në varësi të së cilës përcaktohet dija e tyre.
Fakt është se pjesa më e madhe e këtyre nouveaux riches sot gjenden në universitetet private dhe këta luajnë një rol të rëndësishëm në përçarjen e kategorisë sociale të studentëve si NJE. Tanimë grupet e marxhinalizuara të studentëve së bashku me elitën nouveaux riches mjerisht identifikohen si i njëjti grup social. Emancipimi nën këtë kontekst mund të vijë vetëm si rezultat i refuzimit të këtij identiteti nga ana e atyre që e duan dijen dhe jo vlerën e saj të këmbimit, e atyre që e duan dijen si qëllim në vetvete dhe jo si mjet, e atyre që e mohojnë këtë status-quo dhe jo atyre që e pohojnë atë, atyre që guxojnë të ëndërrojnë dhe jo atyre që vegjetojnë.

Por për të arritur këtë duhet synuar procesi i pamundësisë së identifikimit duke u mbështetur në silogjizmin: “a i përkasim ne grupit të studentëve të Shqipërisë apo jo, dhe çfarë rrjedh nga kjo?”
Sepse studenti nuk ka si të mos jetë NJE, përndryshe ai nuk do të ishte më student. Çdo lëvizje progresiste e viteve 60’-70’ të shekullit të kaluar ka ardhur pikërisht si rezultat i bashkimit të studentëve në NJE. Studenti nuk është notë, regjistër, provim, diplomë, biznes. Studenti është universitet. Universiteti është pasojë e ekzistencës së studentit dhe jo e kundërta, rrjedhimisht duhen ndërtuar studentë dhe jo universitete. Faktet kanë treguar se sa më shumë shtohet sasia e këtyre të fundit, aq më shumë shtohet zbehja e cilësisë së tyre. Duhet prodhuar dije dhe jo diploma. Duhet prodhuar vatër mendimi dhe jo fole’ injorance. Lëvizjet studentore të shekullit të kaluar na mësojnë se kjo mund të arrihet vetëm falë vullnetit për të refuzuar grupimin në mënyrë të tillë që t’ia përshtasin vetes rrethanat e jashtme, dhe jo t’i përshtatet vetja rrethanave të jashtme. Sikurse shkruan Jacques Ranciere, nuk duhet të jenë dijet dominuese që formojnë një student, përkundrazi dijet dominuese formojnë një student mohues sepse dija dominuese pasi i distribuohet studentit ajo filtrohet nga mendja e tij duke e ndryshuar krejtësisht formën e saj të mëparshme, kështu që është studenti që formon dijen dhe jo vice versa. Është e dukshme pra se cilësia e universiteteve shqiptare nuk është shkak i prodhimit të këtyre injorantëve me diploma, por është saktësisht mungesa e vullnetit për të refuzuar ajo që e bën ekzistencën e këtyre injorantëve faktor vendimtar në cilësinë e dobët të universiteteve shqiptare. Dhe kjo katastrofë intelektuale nuk rregullohet nga tregu, përkundrazi rizgjimi i dijes dhe mendimit kritik është ai që duhet t’ia përshtasë tregun vetes. Rizgjimi i studentëve si një grup i bashkuar është shpëtimi i vetëm për dijen dhe mendimin në universitetet tona. Përndryshe tregu do të gllabërojë edhe ato pak gjëra që i ka lënë pa gllabëruar studentit shqiptar.

Kësaj shëmbëlltyre që më tepër sesa shpresën e së ardhmes, mbart në vete apatinë e së shkuarës të cilën na e sjell dhe na e risjell vazhdimisht thjesht dhe vetëm falë prezencës së tij si një send frymor, vegël e dëshirës se si të tjerët vendosin ta vënë në përdorim.

Lulzim Hoxha, T. Observer

"Kur erdhën për mua, s'kish mbetur më askush të më mbronte"

Shumë shqiptarë të mirë sot heshtin.

Heshtin, sepse janë neveritur nga politika e këtyre 20 viteve. Heshtin edhe sepse mendojnë që mos i hapin vetes telashe, që të mos prishin atë pak terezi që kanë krijuar. Heshtin edhe pse ndoshta nuk janë fare votues, ndaj thonë "unë nuk kam votuar, ç'më duhet kjo puna e votës...".


Të heshtim apo të mos heshtim?
Përgjigjen e shkëlqyer kësaj pyetjeje që i mundon shumë jo vetëm shqiptarët e ka dhënë në mënyrë të përsosur Nobelisti i famshëm Çifut, Elie Wiesel, në Romanin e tij të famshëm "Nata". Zoti e bekoftë!

"Në Gjermani ata erdhën fillimisht për komunistët dhe unë nuk fola. Nuk fola, sepse unë vetë nuk isha komunist. Atëherë ata erdhën për çifutët e unë përsëri nuk fola. Nuk fola, sepse unë vetë nuk isha çifut.

Më vonë, ata erdhën për sindikalistët dhe unë përsëri nuk fola. Nuk fola, sepse unë vetë nuk isha sindikalist.

Pastaj, ata erdhën për katolikët dhe unë përsëri nuk u ndjeva. Unë nuk fola, sepse unë vetë isha protestant...

Më në fund ata erdhën për mua dhe atëherë nuk kishte mbetur askush të fliste...", thotë Prifti Martin Niemoller, duke folur për diktaturën naziste në Gjermani.


A nuk ndodhi kështu edhe me diktaturën komuniste në Shqipëri... Unë nuk fola.

Ti nuk fole. Ai nuk foli. Ne nuk folëm. Ju nuk folët.... Ata nuk folën! E filloi me bashkëpunëtorët e fashizmit ne nuk folëm. Ne heshtëm, sepse ne nuk ishim bashkëpunëtorë të fashizmit!
Ata erdhën për bashkëpunëtorët e anglo-amerikanëve dhe ne përsëri heshtëm.

Heshtëm, sepse vetë nuk ishim bashkëpunëtoret e anglo-amerikanëve! Më vonë ata erdhën për agjentët e jugosllavëve, ruseve, kinezëve, të dreqit e të birit... Ne nuk folëm, sepse vetë nuk ishim agjentë të tyre!

Atëherë ata erdhën për pirftërinjtë, hoxhallarët, dervishët, popetë... Ne e qepem, bile edhe u bashkuam me ta, duke ngritur zërin e dorën edhe kundër Zotit! Më në fund ata erdhën për gjeneralët e luftës, për ministrat deri edhe për kryeministrin... Ne nuk folëm. Nuk folëm, sepse vete nuk ishim as gjeneralë, as ministra, as kryeministër.
Kujdes sot!


Alban, student Nju Jork, G. Shekulli

Sot opozita kalon në masa ekstreme, bllokon në orën 17:00 të gjitha rrugët e vendit

Rama, thirrje qytetarëve: Të gjithë në shesh sot për ti dhënë fund kësaj qeverie.

Kur greva e urisë ka hyrë në ditën e 14 opozita ka vendosur të përshkallëzojë protestën e saj. Pas protestave një orëshe në qytetet kryesore të vendi duke bllokuar akset kryesore të qarkullimit mësohet nga drejtuesit e opozitës se sot do të jetë protesta më e madhe.

Në orën 5 opozita ka organizuar gjithë mbështetësit e saj që të dalin në rrugët kryesore për të bllokuar të gjithë rrugët e vendit.

Ndërsa kryesocialisti, Edi Rama gjatë protestës së djeshme të opozitës përsëriti deklaratën se opozita nuk do të ndalet së protestuari nën dritaren e kryeministrit, si edhe në gjithë Shqipërinë. Më tej kreu i PS, i ka dhënë një përgjigje edhe deklaratës së kryeministrit Berisha për protestën e opozitës. Ai theksoi se askujt nuk duhet t’i shkojë në mendje se opozitarët do të lodhen dhe do të dorëzohen, përkundrazi ata do e vazhdojnë deri në fund betejën e tyre. “Flet Berisha për grevën e urisë dhe thotë se do të respektojë të drejtën tonë për të protestuar. Për këtë nuk e pyet kush zotërinë tënde. Protestën do e bëjmë pa u ndaluar në dritaret e zyrës tënde derisa të fitojmë të drejtën elementare të transparencës. Kjo është e drejta që duhet të respektojë Berisha. Është koha të hapim një rrugë të re, të bëjmë transparencë që rruga e re të hapet, që të gjithë bashkë të kuptojmë se kështu nuk vazhdohet më, dhe se për të vazhduar kemi nevojë për rregulla të reja, t’i nënshtrohemi kushtetutës dhe ligjeve. Kemi nevojë që ligjet t’i kthejmë nga letra që i tregojmë Evropës për sa progres kemi bërë me reformat për detyrim nga i pari tek i fundit. Jemi të vendosur për të çuar përpara këtë betejë. Askush të mos i shkojë në mendje se mund të lodhemi, dorëzohemi. Jemi këtu në betejë, nuk duam pushtetin në tavolinë,por duam që në tavolinë të bëhet transparenca që kurrë më pushteti të mos burojë nga fuqia e vetvetes që të mos lejë popullin të mos zgjedhë, por populli të zgjedh më fuqinë e votës së tij që do e qeverisë. Jemi të vetëdijshëm se nëse çlirohet vota, çlirohen të drejtat, mundësitë dhe energjitë e gjithsecilit”, u shpreh Rama.




Apeli ndaj policisë
Kryetari i PS, në fjalimin e tij në protestën e opozitës, i ka bërë një apel policisë së shtetit që të mos ngrejë dorë ndaj deputetëve dhe mbështetësve të opozitës. Duke iu referuar përplasjeve të dy ditëve më parë në qytetin e Korçës, Rama ka paralajmëruar drejtuesit e policisë se pushtete të tilla që vijnë duke grabitur votën nuk e kanë jetën e gjatë. “Të gjithë, pa përjashtim të gjithë ata që sot marrin rrogën e shtetit për t’i shërbyer qytetarëve duke garantuar ligjin, duhet ta fusin mirë në mendje se historia e ka treguar se pushtete të tilla janë pushtete që bien shumë më shpejtë”, ka deklaruar Rama. Kreu opozitar, ka hedhur kritika të ashpra ndaj ministrit të Brendshëm, Lulzim Basha për këtë reagim të dhunshëm të forcave të rendit. “Kemi parë disa komunikata për të bërë presion mbi protestuesit e opozitës. Turp. Ky është një pushtet në kërkim, ka grabitur votat për të vazhduar të grabisë Shqipërinë. Po rrënon ekonominë drejt një pike ku ekonomia mund të rrënojë sërish Shqipërinë”, vijoi ai. Lideri i opozitës ka akuzuar qeverinë edhe për afera korruptive, të cilat sipas tij janë konkretizuar me shitjen e hotel “Dajtit” tek Banka e Shqipërisë. “Ky është një pushtet në kërkim, që po rrënon ekonominë. Sot e morëm vesh të gjithë që për të hedhur ca para në arkën e shtetit, qeveria shet hotel “Dajtin” tek BSH. Ose BSH i bleu qeverisë hotelin”, ka nënvizuar Rama.

Mirënjohje për grevistët
Rama ftoi të gjithë shqiptarët t’i bashkohen protestës së sotme në mbështetje të grevistëve që janë ngujuar prej 2 javësh në çadrat e ngritura në bulevard. “Turp për ata që kanë guxuar dhe guxojnë të hedhin fjalë mbi këta njerëz që dëshmojnë se në Shqipëri është e mundur një betejë për liri, për liri pa të cilat qeveria në këtë vend do të mbetet një sundim për ta mbajtur popullin të gjunjëzuar me bukën e qeverisë”, u shpreh Rama ndërsa theksoi se ka ardhur koha për të hapur rrugë të reja për Shqipërinë. Ai theksoi se opozita ndodhet në protesë dhe grevë urie që Shqipëria e kohës së re të jetë Shqipëri që punon, dhe jo një Shqipëri ku qeveria i mban me bukë shërbëtorët e vet.

Ngjela: 14 Maji, dita kur do të shporrim tiranin me fitore
Kryetari i Partisë Ligj dhe Drejtësi Spartak Ngjela sërish ka përdorur një gjuhë tepër të ashpër në fjalimin e mbajtur gjatë protestës së djeshme të opozitës. Ai paralajmëroi se në protestën e sotme të opozitës, ku mbushen ekzaktësisht dy javë nga fillimi i grevës së urisë, se në protestën e madhe të 14 majit, do të rrëzojnë këtë qeveri. “Grevistët që shkuan në spital, janë të plagosurit tanë. 1 milionë njerëz e kanë të qartë se nuk mund të durojnë më një tiran që u ka dhunuar zgjedhjet dhe i ka varfëruar në ekstrem. Data 14 maj do jetë dita që do shporrim tiranin me fitore. Kjo është një betejë e cila në rast se nuk fitohet nga ne nuk ka më të ardhme për Shqipërinë dhe shqiptarët. Data 14 maj do të jetë shenja kryesore për t’i thënë të gjithëve se shqiptarët do hyjnë në Europë me dinjitet”, u shpreh Ngjela. Më tej, ai sqaroi se cilat janë edhe arsyet e vërteta të kësaj greve, duke pohuar se nuk po kërkohet as marrja e pushtetit dhe as pavarësia e Shqipërisë, se ne e kemi fituar atë, por po kërkohet liria e popullit shqiptar dhe dinjiteti i tij. Më tej, Ngjela ka shtuar se nëse kjo betejë nuk fitohet nga opozita, nuk ka më të ardhme për shqiptarët. “Të jemi dinjitozë përballë lirisë dhe nesër do t’i japim orët e fundit kryeministrit dhe kësaj qeverie. Do t’i hapë apo jo kutitë, kjo do varet nga forca jonë”, bëri me dije ndër të tjera Ngjela. Kreu i PLD, në fjalimin e tij pranë çadrave të grevës së urisë në bulevardin “Dëshmorët e Kombit” në Tiranë duke u bërë thirrje kompozitorëve të rinj shqiptarë të fillojnë kompozimin e këngës së re të lirisë të cilën Elsa Lila do ta këndojë në këtë shesh. Në protestën e djeshme deputeti i PS, Xhemal Qefalia i bëri thirrje policisë të mos i shërbejë pushtetit por t’i shërbejë shtetit dhe të mos i arrestojë padrejtësisht mbështetësit e opozitës. Protesta vijoi më tej me fjalime të grevistëve nga ambientet e çadrave, të cilët u shprehën të bindur për të rezistuar në shërbim të kauzës për transparencë. Deputeti grevist i Lushnjës, Fatos Tushe pasi ka falënderuar mbështetësit në bulevardin “Dëshmorët e Kombit” deklaroi se, ndodhen në grevën e urisë për të ardhmen e fëmijëve, për transparencën e votës së lirë. Ndërsa deputeti i Durrësit, Gazmir Bizhga u shpreh se, kjo është gërmadha e fundit e komunizmit që na ka mbetur në Shqipëri. “Dhe duhet shembur njëherë e më parë. Për dashurinë e atdheut, të fëmijëve tanë, të demokracisë duhet ta shembim këtë gërmadhë që ka zënë diellin. Do të qëndrojmë në grevë, deri në garantimin e transparencës, prandaj ftoj popullin që t’i mbështesë deri në orën 6”, u shpreh ai.

Dokle: Nuk tërhiqemi nga protestat dhe greva
Deputeti socialist, Namik Dokle nisi fjalimin e protestës së djeshme të opozitës, duke nënvizuar se opozita nuk tërhiqet deri në përmbushjen e plotë të kërkesave të saj. “I themi Berishës të mos e gënjejë mendja se do të tërhiqemi nga kjo luftë demokratike, nga kjo e drejtë e jona. Nuk tërhiqemi sepse kemi të drejtë, sepse beteja jonë është për të gjithë Shqipërinë. Nuk tërhiqemi, jemi të gjithë në radhë, deputetë, anëtarë të PS, simpatizantë e qytetarë të thjeshtë që kërkojnë ti bashkohen grevistëve tanë ”, u shpreh Dokle. Deputeti socialist nënvizoi se protestat do të vazhdojnë të jenë paqësore. “Ne nuk përdorim dhunë por kemi qëndresën, arma jonë e fuqishme është paqja, qetësia dhe rezistenca e shokëve dhe shoqeve tona”, theksoi ai.

Braçe: PS do i shkojë deri në fund kauzës së saj
Deputeti socialist, Erjon Braçe u shpreh se sot bëhen dy javë grevë urie nga faza e nisjes së protestave të reja për të kërkuar transparencën e zgjedhjeve. Në fjalën e tij gjatë protestës së djeshme ai ka shtuar se PS do t’i shkojë deri në fund kauzës së saj.Duke akuzuar kryeministrin se nuk do zgjidhjen e krizës, Brace deklaroi se vendi është i zhytur në korrupsion. “Sali Berisha nuk do zgjidhje, ja kanë ndaluar të gjejë zgjidhje. Fuqia e tij është korrupsioni, i cili nuk lejon zgjidhjen e krizës në vend. Janë abuzuesit e përditshëm me paratë tuaja. Janë klientët e partisë në pushtet që kanë fituar gjithçka”, tha Braçe. Në serinë e akuzave të tij, Brace theksoi se arka e shtetit është bosh dhe se po merren borxhe të reja për të rritur me 4 qindarka rrogat. “Saliu nuk bën punën e shtetit si kryeministër por zagarin e bllokut. Arka e shtetit është bosh. Qeveria po merr borxhe të reja për të shtuar rrogat dhe pensionet, vetëm me 4 qindarka”, tha deputeti Braçe.

Hysi: Jemi në këtë protestë për mirëqenie
Deputetja socialiste e qarkut të Tiranës, Vasilika Hysi në ditën e 13 të grevës së urisë dhe të protestës së opozitës, ka ftuar të gjithë qytetarët shqiptarë ta mposhtin frikën e pushtetit sipas saj dhe të dalin të gjithë në protestë më 14 Maj. Sipas saj, protesta bëhet për mirëqenie, për integrim dhe si mbështetje për grevistët. “Ky pushtet nuk e kupton se ne jemi në këtë protestë, për mirëqenie, për integrim për të mirën e gjithë shqiptarëve, prandaj në mbështetje të grevistëve të bashkohemi të gjithë për të treguar forcën e karakterit”, deklaroi Hysi.

Dule: Aksioni politik synon transparencën e plotë të votës
Ndërkaq kryetari i PBDNJ, Vangjel Dule iu kundërpërgjigj peticioneve të artistëve dhe intelektualëve të cilët kanë akuzuar opozitën për pengimin e rrugës europiane të vendit përmes grevës së urisë. “Na thonë se ne, kolegët tanë të nderuar që janë në grevën e urisë, na akuzojnë se mbyllim rrugën në integrimin drejt Europës. Ku ishin këta akademikë, krijues që nuk e ngritën zërin kur nuk na u dha e drejta për të lëvizur pa viza”, u shpreh Dule. Aleati i socialistëve nënvizoi arsyet e grevës së opozitës duke theksuar se aksioni politik nuk synon ndryshimin e rezultatit të zgjedhjeve por transparencën e plotë të votës së çdo shqiptari.


Gjinushi: Presidenti të mbrojë Kushtetutën
Ashtu sikurse nuk ka munguar pothuajse në asnjë protestë të opozitës, edhe ditën e djeshme kryetari i PSD, Skënder Gjinushi ka mbajtur fjalimin e tij të radhës. Ai gjatë fjalës së tij e vuri theksin tek protesta e sotme, duke thënë se, protesta është shtrirë në të gjithë Shqipërinë, dhe se e gjithë Shqipëria do jetë sot përballë kryeministrisë për të shpallur fitoren e kauzës opozitare. “Sot festojmë festën e fitores kundër Berishës. Është koha të kuptojë njëherë e mirë që s’mund të luajë më me durimin e tuja, duhet ta pranonte që në 2006 falimentin e tij”, u shpreh ai. Gjinushi ndër të tjera i bëri thirrje presidentit të mbrojë Kushtetutën e vendit.




Blerina Gjevori, G. Sot

Shqipëria, ndër 30 vendet me borxhe më të mëdha në botë

Shqipëria renditet e 30-ta në botë për borxhin më të madh publik në raport me Prodhimin e Brendshëm Bruto, sipas një raporti të fundit të CIA-s amerikane. Ky raport u referohet shifrave të vitit 2009, kur, sikurse është pranuar tashmë zyrtarisht, niveli i borxhit të përgjithshëm të shtetit shqiptar ndodhet në kuotën e 60 përqindëve.

Viti 2009 u mbyll me një nivel borxhi total publik prej 680 miliardë lekësh (rreth 60% e PBB-së), ndërkohë që edhe në 2010-n do të kemi sërish rritje, që Financat e parashikojnë në 744 miliardë lekë, ose 59.91 për qind në raport me Prodhimin e Brendshëm Bruto, në rast se ky PBB do të shënojë rritjen e planifikuar.
Shërbimet për borxhin kanë ardhur duke u rritur, sidomos në dy vitet e fundit, ku në 2009-n kemi paguar rreth 42 miliardë lekë për interesa dhe kredi.

Për borxhin e brendshëm, vitin e kaluar kemi paguar rreth 31.4 miliardë lekë, kurse për të huajin, afro 5 miliardë lekë.
Shërbimet e borxhit në raport me Prodhimin e Brendshëm Bruto kanë qenë mesatarisht 3.3 për qind, ndërsa në 2009-n pësuan rritje në 3.6 për qind. Borxhi i jashtëm në fund të vitit 2009 krahasuar me 2008-n, vlerësohet në rritje, nga 32 për qind në 39 për qind (37.5 për qind pa ndikimin e kursit të këmbimit) në raport ndaj totalit, duke qenë kështu në përputhje me parashikimet e strategjisë 2009-2011. Huamarrja e brendshme realizohet nëpërmjet emetimit të letrave me vlerë të qeverisë; bono thesari me maturim 3, 6 dhe 12-mujor, si dhe obligacione me maturim 2, 3, 5 dhe 7-vjeçar. Në fund të vitit 2009 ka rritje të portofolit të borxhit të brendshëm afatgjatë në përqindje ndaj totalit, nga 36.6 për qind për vitin 2008, në 37.4 për qind në vitin 2009.

Borxhi i brendshëm afatshkurtër (deri në bono 12-mujore) ka ardhur në vite duke u reduktuar, nga 273 miliardë lekë që ishte në vitin 2006, në 256 miliardë lekë, ndërsa afatgjati, nga 75 miliardë lekë në 2006, në 153 miliardë lekë në vitin 2009, duke ndryshuar raportin (78-22 në vitin 2006, 62-38 në vitin 2009).

Genc Kondi, G. Shqiptare