Kur shqiptarët shesin eshtrat për para

Një pazar ballkanik që ngërthen të kaluarën, ngërthen historinë, tokat e shtrirjen e shteteve.

Disa, jo pse në puthadoras apo servilë, por thjeshtë të pangopur nga babëzia janë të gatshëm të shesin edhe kockat e veta a të të parëve thjesht për të marrë ca para më shumë.

Duket se mbi këtë temë, Edmond Budina ka ngritur një film të tërë. "Ballkan Pazar", është një film historia e të cilit zë fill e merr jetë në një ngjarje të vërtetë.
Në kohën kur ndodhi u quajt skandal dhe qe një ndodhi që tërhoqi vëmendjen e shqiptarëve e grekëve për një kohë të gjatë: skandali i zhvarrimeve në Kosinë të Përmetit.
Ndodhia që ngërtheu opinionin publik dhe "ndezi gjakrat" plot katër vite më parë, pati në qendër të saj zhvarrosjen e eshtrave të vdekurve të fshatit Kosinë.  
Këto kocka u shitën si eshtra të ushtarëve grekë.
Por Budina, teksa e sheh atë me sytë e artit, e ka veshur ngjarjen me tisin e kinemasë. "Ballkan Pazar", pasi ka marrë jetë ndikuar nga ai skandal vjen i parë me një tjetër sy dhe pikërisht përmes humorit. Filmi, i xhiruar në Gjirokastër, me një kastë të zgjedhur aktorësh. Regjisori Edmond Budina ka marrë në filmin e tij aktorë nga Shqipëria, Greqia apo Maqedonia, por nuk është ndalur këtu, pasi i ka kërkuar ata edhe në perëndim si në Francë e Itali. Në mediat shqiptare ai është shprehur se "Ballkan Pazar" është një film tragjikomik, që në fakt nuk ka një qëndrim të caktuar për sa i përket mesazhit që përcjell. Filmi do të shfaqet që nga data 14 prill në rrjetin e kinemave 'Imperial', qendra 'Kristal' dhe kinema 'Agimi'. "Ballkan Pazar" është një prodhim i 'Erafilm Productions' me regji të Edmond Budinës. Premiera e tij jepet në Kinema Kristal, ditën e enjte, ora 20:30

"Kosinë - Varrezat greke me eshtra shqiptarësh"

Tema
A do t'i shisnit eshtrat e babait apo gjyshit, nëse ky do të ishte një biznes shumë fitimprurës?
Kjo është pyetja që shtron Budina në trailerin e filmit. Jolie franceze dhe Orsola italiane, nënë e bijë pas aventurës së humbjes së eshtrave të babait dhe gjyshit të tyre, dhe dërgimit gabimisht në një fshat në jug të Shqipërisë, zbulojnë mbase pazarin më të çuditshëm, atë të eshtrave me anë të të cilave mund të blihet dhe shitet historia në Ballkan. Pse të mos përfitonin dhe ato duke i shitur eshtrat e babait dhe gjyshit të tyre në këmbim të një dashurie të vërtetë

Historia jonë mbështetet në fakte të vërteta të ndodhura disa vjet më parë në jug të Shqipërisë, është një histori e ngatërruar mes kombesh të vjetra që e dinë mirë proverbin ballkanik: Aty ku kohës i ka mbijetuar varri i një bashkëkombësi tënd do të thotë se është një tokë për të cilën ja vlen të vdesësh.
Vetë Budina interpreton njërin prej roleve të filmit, e pikërisht priftin e Kosinës që ka parë të arsyeshme të bëjë biznes duke shitur eshtrat në varrezat e fshatit. Teksa dy gra (nënë dhe bijë), kërkojnë eshtrat e gjyshit dhe babait, gjejnë dhe dashurinë në fshatin e humbur në jug të Shqipërisë. Pa e ditur fare se çfarë gjëje e madhe po ndodh në atë fshat të humbur, vajza dashurohet me një gazetar një shqiptar po ndjek ngjarjen e rëndë. Ndërkaq, as nëna nuk mbetet pas. Ajo dashurohet me një grek, që ndodh të jetë biznesmeni i eshtrave. Kjo është një tjetër pikë e fortë e filmit, ku shohim realitetin ballkanas dhe shitblerjet e tij, dhe një realitet tjetër europian.

Filmi
Në prononcimet e tij mbi filmin, Budina është shprehur se kishte menduar si titull për të "Vallja e flamujve". Më tej i erdhi ideja e titullit aktual dhe kjo sipas Budinës ka një shpjegim të thjeshtë. Ai e titullon "Ballkan pazar" sepse i shkon më shumë për shtat absurditetit të këtij gadishulli, ku sipas regjisorit çdo gjë shitet e blihet, nga kockat tek idetë, nga pasuritë e deri te historia. Teksa e konsideron një fenomen më së shumti ballkanik, Budina thotë se "ne e njohim më mirë këtë realitet, por besoj që kudo ndodh pak a shumë e njëjta gjë, përgjithësisht në vendet ku ka konflikte, po pse jo edhe në vendet e qytetëruara, sigurisht në një formë më të lehtë". Në opinionin e tij, në Ballkan ky realitet është më i dukshëm, sepse edhe marrëzia është më e madhe. "Nuk e di në ç'zonë tjetër do të zhvarroseshin të vdekurit e viteve tetëqind për t'i paraqitur si ushtarë të vrarë më 1940, e të ndërtohej edhe një varrezë monumentale që prej vitesh është bosh" - është shprehur Budina, teksa flet për realizimin e tij më të fundit kinematografik.

G. Shqiptare, Fatmira Nikolli


Këtu mund të ndiqni trajlerin e këtij filmi: http://www.youtube.com/watch?v=1Llr4oasHwY
Stop Injorancës

Ne, të vrarët

Lajmet për shqiptarët ndodh shumë rrallë të jenë të gëzueshme, për të mos thënë nuk ndodh kurrë.

Mesditën e djeshme një lajm më i hidhur se mitingu i Berishës në Librazhd apo takimi i Ramës në njësinë numër dhjetë të kryeqytetit, tronditi mbarë opinionin publik. I biri i një të vrari drejtpërdrejtë nga dora e qeverisë shqiptare, i dha fund jetës në kushtet e një depresioni të thellë që unë do e cilësoja si dëshpërim dhe zhgënjim nga e tërë shoqëria.

Djali i Faik Myrtajt nuk është as i pari dhe as i fundit që i jep fund jetës në Shqipëri, por ajo çka e bën më të kobshëm këtë lajm është fakti se ai me paramendim të plotë i dha fund jetës së tij në moshën 22-vjeçare, jo për bukën e gojës siç bëjnë shumë e shumë të tjerë gjatë një viti. Bardhoshi shkrehu pistoletën në kokën e tij duke gjetur vdekjen e menjëhershme sepse ai nuk e takoi të atin për së gjalli pas protestës së 21 janarit.


Unë kam bindjen e plotë se Bardhoshi sikurse dhe ne të tjerët, ka pësuar zhgënjimin më të rëndë që mund të përjetojë një popull në demokraci; atë të gjetjes së fajtorit e mos dënimit të tij. Tronditja e madhe që pësoi mbarë shoqëria shqiptare pas vrasjeve në mes të bulevardit i solli dëshpërim dhe pasiguri mbarë opinionit publik.

E si mund ta priste ndryshe nga ne të tjerët djali i Faikut vrasjen e të atit?
Unë me cilësinë e qytetarit të ndershëm, korrekt me këtë qeveri dhe ligjet e saj, bëj fajtor drejtpërdrejte Ministrinë e Punëve të Brendshme për plumbin 8 milimetra në kokën e Bardhosh Myrtajt, po aq sa e bëj fajtore edhe për ato plumba të automatikëve mbi trupat e dhjetëra qytetarëve më 21 janar.


Vrasja e Bardhoshit është po aq e kobshme dhe për faktin se ai nuk kishte ngurruar të shkruante dy orë para se t'i jepte fund jetës, një mesazh në rrjetin social "Facebook' ku shprehej se "nëse ke zgjedhur rrugën tënde, atëherë zgjidh më të mirën sepse unë fitova llahtarinë".


Askush nuk mund ta fajësojë Bardhoshin për vetëvrasjen, kur ai me sytë ë tij pa gardistë që zgërdhiheshin në sallën e gjyqit dhe kur kuptoi se as thirrja e mbarë opozitës dhe as ato të familjarëve nuk e ndërgjegjësonin drejtësinë shqiptare.


Fajtore e pashembullt në këtë vetëvrasje është Ministria e Brendshme dhe mbarë qeveria shqiptare, jo vetëm se i vrau të atin në mes të Bulevardit Dëshmorët e Kombit, por dhe për një fakt tjetër. Bardhosh Myrtaj vetëm 22 vjeç kishte një pistoletë, armë luftarake kjo që nuk i takon atij ta mbajë dhe e dalë nga depot e ushtrisë apo policisë shqiptare.

Vdekja e Bardhoshit duhet konsideruar gjithashtu si vrasje e drejtpërdrejtë sepse vetë logjika e kryeministrit të vendit dhe larove që rrinë pranë tij, e cilësojnë si të tillë. Të gjithë jemi dëshmitarë të debatit për vrasjen e ish kryeministrit Mehmet Shehu rreth 30 vjet më parë dhe që vazhdon ende të diskutohet.


Versioni zyrtar i Sali Berishës dhe palaçove rreth tij ndryshe nga ai i grupit hetimor është se Mehmetin me të vërtetë s'e kanë vrarë, por fjalët e rënda të Enver Hoxhës në mbledhje e bënë që të vriste veten dhe ky i fundit është indirekt vrasës. E pra, përse fjalët e Enver Hoxhës paskan ndikuar më shumë tek Mehmet Shehu se sa fjalët e Sali Berishës tek Bardhoshi apo plumbat mbi të atin?


Si ta kuptojmë neve këtë kur kryeministri i vendit, nënën e Bardhoshit dhe e të gjithëve ne i ka cilësuar si lavire, ndërsa baballarët dhe vëllezërit si të droguar. Unë gjej vetëm një përgjegjës tek vrasja e Bardhosh Myrtajt. Ajo është qeveria shqiptare dhe organet e policisë që pikërisht në fushata elektorale bëhen më agresive se kurrë duke provokuar dhe dhunuar këdo, në çfarëdolloj rrethane dhe pa iu dridhur qerpiku fare duke i vënë vetes vulën e zezë dhe kjo ndodh sa herë që qeveria shqiptare drejtohet nga ky njeri që kemi sot mbi krye.


Policia e Shtetit si kurrë më parë për vrasjen e Bardhoshit nuk dha arsyen dhe shkaqet sepse nuk ka fytyrë ta pohojë këtë. Kam bindjen e plotë se janë gati të bëjnë çdo gjë për ta nxjerrë vetëvrasjen e tij si pasojë e një borxhi të madh që nuk e shlyente dot, që dhe në se e ka pasur, tregon mjerimin e kësaj shoqërie që s'bëri kurrë përpara. Vrasja e Bardhosh Myrtajt nga fshati Kreshpan i Fierit, nuk është e para.

Një vit pas shpërthimit në Gërdec ku po kjo qeveri me këto surretër si ministra vrau 26 vetë, një baba i dha fund jetës.
Ai ishte Kujtim Osmani, i cili kishte humbur nga flakët e Fatmir Mediut, të bijën e tij Resmie Osmanin, vetëm 18 vjeç. Kujtimi si dhe Bardhoshi nuk mundën kurrë të merrnin përgjigje dhe të shihnin fajtorët para drejtësisë sepse vrasësit e familjarëve të tyre nuk ishin një person i vetëm, por një qeveri e tërë.


Deri atëherë sa guximi dhe drejtësia të na rikthehen dhe vrasëse apo avokate e krimit të jetë vetë qeveria, duhet të kuptojmë se kemi rënë në gjak me qeverinë.  

Ndryshe nuk kanë si shpjegohen makinat e blinduara qindra milionëshe dhe rrethimet e rrugicave të ministrave me kompani të tëra ushtarësh. Plumbi që depërtoi në kokën e 22-vjeçarit Bardhosh Myrtaj duhej të ishte ngulur diku tjetër. Në atë vend që e kemi të gjithë në mend, por nuk na e mban ta themi se i trembemi fatit të Kosta Trebickës.

Ardit Rada, Shekulli

Adoleshenti shkonte me gruan e politikanit, por dhe me vajzën e tij!

Susan Brock para gjyqit!

Gruaja e një politikani në Arizona, SHBA, është burgosur me 13 vite për shkak se kishte një aferë tre vjeçare me një adoleshent.

Susan Brock nisi ta mashtronte adoleshentin me lojëra të tilla si Xbox që kur ai ishte 11 vjeç.

Nëna e tre fëmijëve nisi të bënte seks me adoleshentin kur ishte 13 vjeç dhe lidhja vijoi deri kur ai u bë 17 vjeç.



Por në të njëjtën kohë, edhe vajza e saj, 18 vjeçarja Rachel, shkonte me adoleshentin. Edhe ajo do dalë në gjyq, por pritet të marrë një dënim më të ulët.

Burri i saj, drejtues në një bashki të Arizonës, ka kërkuar divorcin.

Tema

Rruga e Arbrit, fituesi i paracaktuar

Drejtoria e Përgjithshme e Rrugëve ka zhvilluar në datën 8 prill dy tendera.
I pari ka qenë ai për ndërtimin e ‘Rrugës së Arbrit’ (segmenti Ura e Brarit – Hyrje tuneli Qafë Murrizë), me fond limit të përcaktuar, vlerën prej 1.945.051.750 lekësh.

Ndërsa tenderi i dytë ka pasur për objekt prokurimi sistemim-asfaltimin e rrugës Librazhd-Qafë Stude (loti 3). Fondi limit i përcaktuar ka qenë 1.894.399.110 lekë. Për të mundësuar që të dy këto tendera të fitohen me vlerën e tyre të plotë, nga ana e DPRR-së është vendosur një kriter diskriminues, që aktualisht e plotësojnë vetëm dy firma.
Bëhet fjalë për kompanitë “Gener 2” dhe “Victoria Invest”, të cilat dyshohet se janë paracaktuar si fituese.

Tek kërkesat e kualifikimit të të dyja prokurimeve, kriteri diskriminues i vendosur nga ana e DPRR-së është se “kandidati/ofertuesi duhet të dorëzojë licencën profesionale për ekzekutimin e punëve me kategorinë NS-10 G (shtresa dhe mbistruktura speciale) me vlerë të punimeve të kryera mbi 800 milionë lekë”.  
Pikën e licencimit NS-10 G, deri para dy muajsh, nuk e ka disponuar as edhe një shoqëri e licencuar në Shqipëri në fushën e ndërtimeve.
Kjo pikë licence iu jepet firmave për punime speciale siç janë pistat aeroportuale dhe nuk ka të bëjë fare me ndërtimin e rrugëve. Për të shmangur konkurrencën, “Gener 2” dhe “Victoria Invest” iu është dhënë kjo pikë licence vetëm para dy muajsh. Duke qenë të sigurt se nuk ka asnjë firmë tjetër që e plotëson kushtin NS-10 G, atëherë nga ana e Drejtorisë së Përgjithshme të Rrugëve është përdorur ky kriter tek të dy tenderat. Dyshohet se “Gener 2” dhe “Victoria Invest” janë futur në tender, tek njëra në vend të parë dhe tjetra plotësuese dhe tek tenderi tjetër anasjelltas. Të bindura se në të dy prokurimet nuk mund të marrë pjesë asnjë firmë tjetër vlera do të jetë e plotë pa ulje. Tendera të tillë të zhvilluar vetëm pak kohë më parë janë ulur me mbi 30 për qind.
E kontaktuar dje nga “Gazeta Shqiptare”, zëdhënësja e Ministrisë së Transporteve, Arminda Qylafku nuk ka preferuar të bëjë as edhe një koment lidhur me fatin e tenderit për ndërtimin e rrugës së Arbrit apo asfaltimit të rrugës Librazhd-Qafë Stude. Në rast se në datën 8 prill, fitues të të dy tenderave janë shpallur “Gener 2” dhe “Victoria Invest”, atëherë prapa skandalit dyshohet se fshihet edhe një aferë e madhe korruptive, pasi në vlerë totale të dy prokurimet kapin shifrën rreth 4 miliardë lekë.

Pronari i shoqërisë “Gener 2” është Bashkim Ulaj, në pallatin e ndërtuar prej të cilit, banon aktualisht kryeministri, Sali Berisha. Ulaj njihet gjithashtu dhe si një prej biznesmenëve më të afërt pranë shefit të qeverisë.

Avokati i Prokurimeve në raportet e tij vjetore të dy viteve të fundit (2009 dhe 2010) në mënyrë të përsëritur ka ngritur si shqetësim kryesor vendosjen nga autoritetet shtetërore kontraktore të kritereve diskriminuese në hartimin e dokumentit të tenderit.  
Sipas Avokatit të Prokurimeve, kriter diskriminuese kanë si synim favorizimin e subjekteve të caktuara, firmave tenderuese, duke krijuar premisa për shmangien e konkurrencës së ndershme.

G. Shqiptare, Tedi Blushi

Francë, nga sot "STOP Ferexhesë" në vendet publike

PARIS- Hyn në fuqi ligji  që ndalon mbajtjen e ferexhesë në të gjitha vendet publike duke bërë Francën si vendi i parë europian që zbaton një masë të tillë.

Ligji, i miratuar nga parlamenti më 11 tetor 2010 pas një debati tepër të ashpër, prek afro 2 000 gra, në një vend që, sipas vlerësimeve, numëron 4-6 milionë persona me traditë myslimane.

Tashmë është e ndaluar të mbulohet fytyra me perçe, kaskë apo kapuç në hapësirë publike, domethënë në rrugë, parqe publike, stacione apo mjedise tregtare.

Forcat e rendit nuk kanë kompetencë të detyrojnë heqjen e ferexhesë tek personat që e mbajnë, por këta të fundit rrezikojnë një dënim maksimal prej 150 euro gjobë dhe/ose pezullim të shtetësisë.

Përveç kësaj, burrat që detyrojnë një grua të vishet me ferexhe rrezikojnë një vit burg dhe 30 000 euro gjobë, ndërsa dënimi dyfishohet nëse personi i detyruar është i mitur.

Ligji hyn në fuqi në kohën kur vendi i islamit dhe laiciteti janë kthyer në tema madhore të debatit politik në Francë, një vit nga zgjedhjet presidenciale të 2012 dhe në sfondin e fuqizimit të ndjeshëm të Frontit Nacional (ekstremi i djathtë) i Marine Le Pen.

(s.g/BalkanWeb)

Në Ferizaj, përkujtohet Enver Hoxha

“Fronti popullor i Kosovës për mbrojtjen dhe kultivimin e veprimtarisë revolucionare të shokut Enver Hoxha”, me rastin e 26-vjetorit të vdekjes së liderit komunist, Enver Hoxha, ka mbajtur në Ferizaj një marsh përkujtimor. 

Kryetari i këtij formacioni, Remzi Hasani, me këtë rast ka shkëputur momente nga biografia e Enver Hoxhës, duke thënë se ai përfaqëson një figurë shumëdimensionale që ka lënë gjurmë të pashlyeshme në historinë më të re të Shqipërisë. 

Ai ka thënë se nën përkujdesjen dhe dorën e fuqishme të Enverit, Shqipëria arriti të ngrihej në një kala të re tërësisht moderne, duke përballuar dhe shpartalluar çdo ndërhyrje dhe komplot nga bota e jashtme. 

“I goditi pa mëshirë të gjitha agjenturat dhe qendrat e spiunimit ndërkombëtar, të cilat moto të veprimit kishin përmbysjen e pushtetit popullor, ri-copëtimin dhe aneksimin e vendit tonë, por që u shpartalluan” theksoi Hasani. 

Në këtë tubim të përmotshëm u tha se gjurmët e enverizmit ndër shqiptarët edhe sot duken kudo. 

“Ai foli qartë dhe fuqishëm gjatë luftës në Kosovë, sepse armët e tija të deponuara në nëntokën shqiptare e të dedikuara për vëllezërit kosovarë, e goditen për vdekje makinerinë ushtarake të Millosheviqit. Enveri foli fuqishëm edhe në Gërdec, duke porositur, mos luani me armë që i ndërtuan për mbrojtjen e Shqipërisë, sepse do të digjeni në to. Zëri i Enverit u dëgjua edhe në kohën e vërshimeve”, ka thënë Hasani. 

Ndërkohë, ky tubim solli edhe fakte se periudha e enverizmit asnjëherë nuk ka punuar në dëm të Kosovës dhe popullit shqiptar. 

“Faktet historike dëshmojnë se Enver Hoxha nuk e nënshkroi Helsinkin, duke u përballur me presion dhe rreziqe ndërkombëtare, vetëm e vetëm për të mos e legjitimuar copëtimin e Shqipërisë edhe nga vetë shqiptarët”, ka theksuar kryetari i frontit, Remzi Hasani. 

Këtë marsh përkujtimor e ka përshëndetur edhe përfaqësuesi i këtij fronti nga Prishtina, Zenel Hasani, ndërsa për të pranishmit nuk munguar poezitë dhe këngët për Enver Hoxhën.

Gjatë muajve tetor dhe prill, Ferizaj, bëhet qendra e përkujtimit të kësaj figure historike, duke mbledhur shumë simpatizantë jo vetëm nga Ferizaj. U bë e ditur se ky formacion politik, me qëllim të fuqizimit, shumë shpejt do të bëhet edhe me degët e saja në Prishtinë, Shtime dhe Mitrovicë, për t’u shtrirë në qendrat tjera të Kosovës.

http://www.24-ore.com/

UFO-t kanë zbritur në Tokë

Ai që beson në ekzistencën e UFO-ve, tashmë ka edhe një arsye më shumë për ta bërë këtë gjë.

Faqja e FBI-së ka publikuar disa dokumente në të cilat bëhet e ditur se jashtëtokësorët janë vëzhguar në New Mexico, në aksidentin e famshëm të Roswell-it.

Raporti i FBI-së, i datës 22 mars 1950 dhe i formuluar nga agjenti Guy Hottel, citon një burim të aviacionit amerikan i cili pohon se tre disqe fluturuese me diametër 16 metra janë gjetur në New Mexico pasi kanë rënë për shkak të interferencave elektronike të provokuar nga radarët e ushtrisë.

“Cdo disk kishte tre jashtëtokësorë të gjatë 1 metër dhe ishin të veshur me kostume metalike”, lexohet në raport.

T. Channel

Kush ka ende dyshime le të hedhë vetë një shikim mbi dosjen prej 69 faqesh në faqen zyrtare të FBI-së.

http://vault.fbi.gov/UFO/UFO%20Part%201%20of%2016/view

Ndal Paditurisë

Në IRJM shqiptarët kanë më shumë xhami se shkolla

Sipas të dhënave të pohuara nga OJQ-ja "Bashkësia Fetare Islame", në IRJM numri i xhamive të kësaj OJQ-je kalon 650 syresh dhe tendenca është në rritje me 3-4 xhami të reja për muaj.

Ndërkohë duke parë të dhënat e shtypit për arsimin shqip në IRJM, rezulton se ka 53 objekte shkollore të arsimit fillor vetëm shqip (nga 356 gjithsej) dhe 36 objekte shkollore arsimit të mesëm vetëm shqip (nga 133 gjithsej) duke lënë jashtë këtu paralelet që janë të përfshira në objekte sllave dhe tendenca është në rënie, ku ka pasur dhe djegie të objekteve.

Në dritë të këtyre vihet re se ndërtimi i shkollave shqipe në IRJM has në pengesa nga më të ndryshmet që fillojnë nga zvarritja ose mosdhënia e lejeve, te vendosja larg qendrave të banuara, te mospagesa e mësueve shqiptarë, te devijimi i nxënësve shqiptarë në shkolla sllave, te mungesa e fondeve, te presioni institucional, policor etj.

Por krejt e kundërta ndodh me ndërtimin e xhamive, të cilat "si për çudi" lejohen të ndërtohen lirisht, madje financohen plot bujari nga të gjitha palët.

Me një shikim të parë vërejmë se ka një ndarje në faktorë të brendshëm dhe të jashtëm që sjellin 650 xhami arabe përkundër 89 shkollave shqipe. Te faktorët e jashtëm janë natyrisht regjimi pushtues sllav, Turqia, Arabia, Serbia dhe misionet ndërkombëtare. Por ajo që na intereson këtu janë faktorët e brendshëm.

Faktorët e brendshëm ndahen në dy kategori, sipas ndarjes në zona:

1. Mosinteresimi total i qeverive shqiptare të Zonës 1 për arsimin shqip në Zonën 2.

2. Shqiptarët e Zonës 2 kanë financuar dhe vazhdojnë të financojnë ngritjen e xhamive dhe nuk financojnë ngritjen e shkollave shqipe (të cilat presin t'i financojë regjimi pushtues, që është absurde).

Këto janë dy të vërtetat që përbëjnë probleme madhore që askush nuk i përmend dhe që gjithkush mendon se do të zgjidhen vetë.

Mesdimr, Vargmal

Rend or rend...

Unë zakonisht eci në këmbë, nuk para më pëlqejnë mjetet e transportit.

Natyrisht më ka rastisur të eci nëpër qytet edhe ditë festash e veçanërisht ditët e festave kombëtare.

Kam parë nëpër bulevard ndonjë flamur tek-tuk, kam parë njerëz të vijnë vërdallë, por gjithsesi jo ndonjë entuziazëm të madh, veç entuziazmit të të pasurit nja dy ditë pushim.

Vazhdoj të mos i preferoj mjetet e transportit, sidomos tani në pranverë. Marr këmbët në dorë - si i thonë një shprehjeje dhe shëtis. E shoh flamuj…!!

Flamuj kudo, në çdo cep, çdo kënd, çdo rrugë, në çdo shtyllë, madje edhe në ato ku mungon drita. Nuk kam pse shkoj deri në bulevard për të parë flamuj me ngjyra, mjafton të bëj një hap tek dalja e pallatit.

Si ka mundësi?

Eshtë festë, është fushatë!!

Dhe ua kam fjalën tek flamujt, sa shumë valëviten. Shumë më tepër nga ç’valëviten edhe ata të nëntorit!!

Po normale…janë të pacipë, nuk rëndon mbi ta asgjë, aq më pak gjak heronjsh, siç rëndon mbi flamujt e nëntorit.

Por sa valëviten këta flamuj sot… Në makina e fugona, tek targat, antenat e tek xhamat. Kanë imunitet.

I sjell vërdallë nëpër ajër forca e frikshme e hipokrizisë, e mashtrimit. Për një moment më duket sikur valëviten aq shumë sa kam frikën e shtyllave të porsavëna të dritave në trotuar!! Më lodhet qafa tek i shoh nëpër shtylla ndaj ul pak kokën…dhe prapë flamuj që valëviten! I mbajnë në dorë ‘shtyllat’ njerëzore!!

…Jepi, mere një dhe ti. Bashkohu me turmën,pse jo?

Dil në shesh, pas pak do fillojë të flasë ‘ai’ I flamurit! Ka shumë për të të thënë në këtë fushatë të re me zakone të vjetra.

Vrapo ta dëgjosh!!! Brohorit fort, me ‘urraaaa’ të zgjatura, bërtit me sa ke në kokë për çdo mashtrim të ri. Rend ore Rend...

Në çdo bashki a komunë të harruar, ku paria me 500 automjete luksoze vjen të të marrë votën.

Ja dëgjoje, mashtron shumë më bindshëm se herën e fundit..për ty të paktën!! Uau,sa bukur ë?? Të pëlqen?? Një ‘urraaaa’ tjetër, doza e hipokrizisë u shtua.

Çfarë atmosfere!!!

Jeni aty të dy, mashtruesi dhe I mashtruari!! Vetëm ju në fakt mund ta kuptoni adrenalinën që ekziston në atë shesh! Vazhdo, bërtit…KUJDES! FLAMURIN!! Mbaje lart,valëvite fort! Çirru!!!

Po më flet? Bërtit pak, çfare po më thua? ….Je i trashë? Mëndjengushtë? Gënjehesh me pak? S’ke çfarë?? …ë, në rregull ,quhet vizion…Pra, s’ke vizion??? Dhe ende më pyet a je i duhuri për të valëvitur flamurin në shesh???

PO TI JE I DUHURI!!

Ata ty të kanë kërkuar e të kërkojnë vazhdimisht!!

S’mund të gjenin valëvitës më të përshtatshëm. Jepi…flamurin lart, valëvite derisa të mpihesh, ulërit derisa të ngjiresh! Sot ai flamur të jep nder, të jep emrin MILITANT, zemrën ai ta gaton, plot me urrejtje e zjarr!!

Ti nuk i ke në xhep aq para sa ka kushtuar flamuri që mban mbi duar, fëmija yt nuk i ka ngrënë aq lekë çokollata këtë vit, por ti mos u mërzit. Ti mbaje flamurin lart, shpërndahu rrugëve e rrugicave të Shqipërisë për të përhapur lajmin e fitores mbi hordhitë shqiptare. Ulërit për hajdutin tënd të preferuar, shaje me libër shtëpie armikun politik. Sa më shumë të shash në publik, aq më të mëdhaja bëhen shancet (që në mos të dhënçin një vend pune,) një thes miell ta fitosh.

Po mashtrohesh për kushedi të satën herë, por sot je edhe më i lumtur, je i paarritshëm, je unik…

TI JE MILITANT!

Shkroi: Anisa Kushta

Red. (Stop Injorancës) 

Plani për “turqizimin” e Prizrenit

Frika se mos po humbin dhe po asimilohen si komunitet, turqit e Kosovës në fillim të procesit të regjistrimit të popullsisë kanë përdorur edhe rrugë joligjore për qëllim që përqindja e këtij komunitetit të rritet dhe të jetë shumë më e madhe sesa në fakt ekziston.

E tëra ka ngjarë në Prizren, vend në të cilin komuniteti turk është më i pranishëm, madhe edhe gjuha turke është mjaft e përdorur edhe nga ata që e cilësojnë vetën kosovarë apo pjesë e komuniteteve të tjerë.

Nën organizimin e Degës së Partisë Demokratike Turke të Kosovës (KDTP) në Prizren në krye me Xhemail Lumën dhe me përkrahjen e nënkryetarit të komunës së Prizrenit, Orhan Lopar, sipas burimeve të gazetës Zëri, dy ditë parë nisjes së regjistrimit, janë hapur tri zyra “për të informuar popullatën se si të bëhet regjistrimi”.

Zyrat të cilat janë hapur në lagjen Kurillë, Terzi Mahallë dhe Ortakollë të Prizrenit, sipas burimeve të gazetës, kanë pasur të angazhohen punonjës të cilët kanë pasur obligim që të inkurajojnë popullatën për t’u regjistruar si turk dhe të mos e humbin identitetin, madje edhe të bindin persona të komuniteteve.

Por, e gjithë kjo nismë, që për qëllim ka pasur rritjen e shifrës zyrtare të turqve në Kosovë, është penguar nga policia. 

 

/Telegrafi/