Sunday, September 27, 2009

Stop Injorancës, në terren

Eshtë hapur një dritë jeshile, që kjo nismë tashmë të shtrihet nga bota virtuale në terren, për të konkretizuar qëllimin e saj, luftën ndaj paditurisë. Ekziston një plan që do të mbështesë financiarisht nismat për zhvillimin intelektual të qytetarëve

E nisur si një dëshirë, e lindur inercisht nga problemet e shumta që përjeton shoqëria shqiptare në këtë tranzicion të gjatë e të përgjithshëm, tashmë ka bërë jehonë dhe ka përkrahësit e saj.

Duke publikuar artikuj që pasqyrojnë ndër problemet themelore të shoqërisë shqiptare dhe duke debatuar mbi zgjidhjen e mundshme të këtyre problemeve, tashmë kemi krijuar një komunitet i cili nuk pranon kushtet në të cilat ndodhemi. Një komunitet i cili shpreson dhe beson se Shqipëria i ka të gjitha kushtet e mundshme jo vetëm për të dalë nga ky tranzicion shoqëroro-kulturor, por edhe të ecë me hapa të sigurt drejt zhvillimit kombëtar. Eshtë detyrë morale e çdokujt prej nesh të japë kontributin e tij për vendin ku është rritur apo ku jeton, që të jetë një vend më i sigurt për të gjithë brezat e tjerë që do të vijnë.

Me anë të peticioneve të ndryshme, të gjithë bashkë mund të krijojmë një zë të fortë e të përfillshëm, për të mirëorientuar çdo reformë të ndërmarrë, në interes të gjithë bashkombasve tanë.

Duke realizuar fushata sensibilizimi, duke iniciuar manifestime, duke hedhur ide dhe plane të ndryshme, të cilat mund ti konkretizojmë bashkë, duke ideuar reforma në arsim me programe eksperimentale, duke krijuar sisteme paralele me ato egzistueset në komuna apo bashki, kjo Shqipëri do të bëhej një vend ku të rinjtë nuk do donin të largoheshin, por do të punonin e do të fitonin në vendin e vet, pranë familjes së tyre.

Të çohen intelektualët nga kafenetë ku bisedojnë për fatin e tyre njësoj sikur flasin për personazhe imagjinare, e jo për jetën e tyre. Të bashkohen njerëzit që e duan dijen dhe që e mendojnë si të vetmin çelës i cili hap çdo rrugë zhvillimi. Mjaft me indiferentizëm ndaj fatit tonë, të cilin vetem ne e kemi në dorë.
Të rizgjojmë vetëdijen kombëtare dhe të përhapim qytetarinë. Të njohim dhe të mbrojmë të drejtat tona.

Nëse në një afat të shkurtër kohor, STOP INJORANCA kthehet në një organizatë që do të veprojë direkt në terren, përballë problemeve të shumta të shoqërisë sonë, kush do ishte kontributi juaj ?



SHQIPERINE MUND TA BEJNE VETEM SHQIPTARET !

Shkroi dhe përgatiti : Stop Injorancës

http://www.facebook.com/NdalPaditurise2



No comments: