Tiranë- Kreu i shtetit Bamir Topi do të ndodhet para një pozite të vështirë teksa do të duhet të dekretojë Fatmir Mediun në rolin e ministrit të ri të Mjedisit në qeverinë “Berisha”.
Kreu i Partisë Republikane mbart një të kaluar që lidhet me ngjarjen tragjike të Gërdecit ku gjetën vdekjen 26 persona dhe u plagosën rreth 300 të tjerë. Më shumë se kaq, Mediu është thirrur zyrtarisht si i pandehur në gjykatë nga Prokuroria e Përgjithshme. Procesi gjyqësor në ngarkim të tijin pritet të fillojë në mes të muajit shtator, pikërisht moment kur ai do të ulet sërish në karrigen e ministrit. Neni 98 i dokumentit themeltar të shtetit, Kushtetutës, thotë se ministri emërohet dhe shkarkohet nga Presidenti i Republikës, me propozim të Kryeministrit, brenda shtatë ditëve. Dekreti duhet të shqyrtohet brenda dhjetë ditëve në Kuvendin e Shqipërisë. Juridikisht nuk ekziston asnjë pengesë mbi të cilën Mediu të privohet nga e drejta për tu zgjedhur dhe për të zgjedhur. Juristët sqarojnë se në rastin e atyre që janë në dhomat e paraburgimit apo nën hetim nga prokuroria, qoftë edhe kur ajo i ka thirrur si të pandehur zbatohet parimi i prezumimit të pafajësisë. Pra, për aq kohë sa nuk ka asnjë vendim të formës së prerë të gjyqësorit që ta shpallë të fajshëm një shtetas, ai cilësohet juridikisht i pafajshëm. Por teksa kreu i shtetit duhet të firmosë dekretin për Mediun nuk ka se si të harrojë tragjedinë e freskët të Gërdecit. “Ndëshkimi” i mundshëm do të ishte më shumë një veprim moral se sa veprim i bazuar në nene Kushtetute dhe ligjesh. Në vijimësi në deklaratat e tij Topi ka qenë në mbështetje të zbardhjes së ngjarjes së Gërdecit dhe ka kërkuar nxjerrjen e përgjegjësive pavarësisht nivelit ku arrijnë ato.
Ndërkohë, rizgjedhja e Mediut në postin ministror do të kontribuojë maksimalisht në mbylljen dhe harrimin e “Gërdecit” si një tragjedi. Mediu u zgjodh në postin e ministrit të mbrojtjes menjëherë pasi e djathta u kthye në pushtet në korrikun e vitit 2005. Detyre që e mbajti deri në shpërthimin e fabrikës së demontimit të municioneve në Gërdec, kohë kur dha dorëheqjen dhe u largua nga qeveria. (Lajmifundit)
Nënshkruani këtu peticionin kundra vendosjes së Mediut në qeverinë Shqiptare
http://apps.facebook.com/p
No comments:
Post a Comment