Mes tyre adoleshentët tregojnë përvojat, por edhe mungesën e tyre në shumë raste. E ndërsa sensibilizimi për përdorimin e metodave kontraceptive mes nxënësve ishte në nivele të ulëta, situata është përmirësuar ndjeshëm 5 vitet e fundit.
Në këtë konkluzion kanë arritur specialistët e Institutit të Shëndetit Publik, të cilët kanë ripërsëritur studimin në këtë target-grup, për sjelljet seksuale. Nga të dhënat rezulton se mbi 75% e gjimnazistëve që kryejnë marrëdhënie seksuale përdorin prezervativët.
Në studimin e vitit 2005 shifrat ishin rreth 61%. Por ndërsa janë të informuar për këtë lloj metode, nxënësit e shkollave të mesme kanë pak informacion për metodat e tjera moderne kontraceptive.
“Megjithëse kemi një përmirësim të situatës, sërish duhet më shumë punë edhe nga vetë shkollat për më tepër sensibilizim dhe më shumë njohuri rreth aktivitetit seksual”, thonë specialistët e ISHP. Ndërkaq, sipas të dhënave të studimit ka një rënie edhe të shtatzënive të padëshiruara në shkollë të mesme, por gjithsesi fenomeni ekziston.
- Në 2005 nga të dhënat e studimit në 4000 gjimnazistë rezultonte se rreth 3.5% e vajzave pranonin se kishin përjetuar një shtatzënisë gjatë viteve të shkollës së mesme. Në studimin e fundit kjo shifër është ulur në 3%.
Adoleshentet pranojnë se as nuk e kanë çuar ndërmend se mund të sjellin në jetë një fëmijë në këtë moshë. Ndërsa për aq sa ka ndodhur, fajin ua hedhin partnerëve.
Sipas tyre, janë ata që nuk kanë dashur të kenë një marrëdhënie të mbrojtur, ato thjesht u janë bindur.
Një tjetër problem shqetësues mbetet mungesa e informacionit për dhjetëra sëmundje seksualisht të transmetueshme. Mjekët pohojnë se të rinjtë nuk ua vënë veshin këtyre problemeve që mund t’u kushtojnë shtrenjtë për shëndetin e për marrëdhëniet që kanë. Sipas tyre, mbrojtja më e thjeshtë prej këtyre infeksioneve është përdorimi i prezervativit. Vetëm duke përdorur atë, të rinjtë i shpëtojnë njëkohësisht dy të “këqijave”: shtatzënisë së padëshiruar dhe sëmundjeve seksualisht të transmetueshme.
Ndërkaq, sipas të dhënave të studimit më shumë se 1/5 e gjimnazistëve, kanë pranuar se kanë kryer marrëdhënie seksuale gjatë viteve të gjimnazit. Numri i meshkujve që e pohojnë një gjë të tillë është 4 herë më i madh se ai i femrave.
Marrëdhënia seksuale në moshë të vogël mund të lërë pasoja të shumta në shëndet, sidomos te femrat. Ato mund të përjetojnë një shtatzëni të padëshiruar, që në shumicën e rasteve i çon drejt abortit me pasoja deri në sterilitetin e tyre.
Ndaj është shumë i nevojshëm informacioni për metodat kontraceptive, për të pasur një aktivitet seksual të shëndoshë.
Zirina Llambro, G. Panorama
No comments:
Post a Comment