"Po shfrytëzojnë tolerancën tonë hyjnore ndaj të keqes"

Pas cilësimit të bejtexhiut të Shkodrës si një nga 5 piktorët më të mëdhenj aktual të Evropës (Tritan Shehu), pas hedhjes së firmës në dokumentin e Pavarësisë së vitit 1912 nga kryeparlamnetarja e 2007 (Jozefina Topalli), pas negociatave në vazhdim dhe këmbëngulëse që nga viti 1919 me Qeveritë italiane për eshtrat e Ismail Qemalit (Ferdinand Xhaferi), pas cilësimit "


...lëndim i lehtë i gazetarit Mero Baze..." të fenomenit shtetëroro-mafioz (Sali Berisha), pas cilësimit të Gërdecit dhe Tunelit si "gjëra që ndodhin" (në unison), ja tani edhe ministri "fringo" i PD-së (nuk është lapssus), Petrit Vasili thotë: "...ata që pinë duhan e alkool nuk do të trajtohen në spitalet publike (nëse janë në proces do t'u ndërpritet ky trajtim), sepse tarifat e shërbimit ndaj tyre janë shumë të shtrenjta dhe Qeveria nuk i përballon dot" ?!

Pra, bëhet fjalë për pacientët e siguruar, që në këtë mënyrë nuk mund të kurohen askund. Po në spitalet private? Petriti nuk thotë gjë, se nuk është kompetent, derisa të hapë ai një të vetin.


dërsa shtetasit që kanë mundësi ekonomike (të siguruar ose jo) për të përballuar atë që s'mundet Qeveria, mund t'i kthejnë spitalet, sidomos ato publike, në PAB-et (apo PUB-et) e tyre personale, përderisa arsyeja e kësaj mase të paarsyeshme, është pamundësia ekonomike e Qeverisë sonë (!!)


Shqiptarë, bashkatdhetarët e mi të dashur! Vërtet të kemi rënë kaq poshtë? N.q.s., po, PSE? Kjo "PSE" nuk është nga ato të Petro Markos, ajo e ka përgjigjen brenda. Ne po na trajtojnë si me të tëra inferioritetet për ditë e më shumë, gjë që s'ka ndodhur as në regjimin e Zogut e as në atë të Hoxhës. Të dy këta kanë qenë më të zgjuar, më me kulturë e me edukatë se sa thjesht sundues.


Të sotmit nuk u afrohen cilësive të tyre, për nga niveli që shfaqin çdo ditë kudo e me këdo, që s'është me 'ta. N.q.s., dy të parët kuptuan se si mund të qeveriseshim ne shqiptarët, të sotmit janë krejt të paskrupuj dhe po shfrytëzojnë kriminalisht urtësinë, durimin dhe tolerancën tonë hyjnore ndaj së keqes.



Nuk ka si shpjegohen ndryshe këto "lëndime të vockla", që ne i hedhim pas krahëve njeri pas tjetrit: "...po nuk votove për ....nesër mos u duk në punë"; "...fotografo votën tënde..."; "...Gërdeci, gabim njerëzor..." (në gjuhën juridike "rast fatkeq"); "...Tuneli i Kalimashit dihej që mund të shembej, por ne me "lëkurën tuaj të shtatë" po e riparojmë"; "...u rrah një gazetar, e çfarë pastaj? Në Botë po vriten..."; "...u fut Serbia para nesh në Shengen? Tani e tepruat! Po ndërhyni në punët e brendshme të Qeverisë!"


Është krejt e vërtetë, moj Qeveria ime (Jona). Të gjitha janë punët e tua të brendshme, por sidomos kjo e fundit. Sepse, sa më larg Evropës të jemi ne durim-mëdhenjtë e qeverisur prej Teje, aq më lehtë na shkakton "lëndime të vockla" dhe aq më shumë këto nuk do të meritojnë vëmendjen e askujt.


Email nga adresa shak_rac@hotmail.com tek Shekulli